Isroil Mudofaa vaziri iste'foga chiqdi. U hukumatni «terrorchilarga taslim bo‘lish»da aybladi

Isroil Mudofaa vaziri Avigdor Liderman iste'foga chiqdi. Bu haqda The Jerusalem Post xabar bermoqda.

Knessetda (Isroil parlamenti) o‘z partiyasi fraksiyasidagi chiqishi vaqtida u hukumat G‘azo sektorida o‘t ochishni to‘xtatishga rozi bo‘lishini terrorchilarga taslim bo‘lish deb atagan.

13 noyabr kuni Liberman va Isroil hukumatidagi yana 3 nafar vazir G‘azodagi vaziyat bo‘yicha Falastin bilan sulh tuzilishiga qarshi chiqishgandi. Tomonlar Misr vositachiligida o‘t ochishni to‘xtatishgandi.

12 noyabr kuni G‘azo sektoridan Isroil hududiga yuzlab raketalar yog‘dirilgandi. OAV ma'lumotiga qaraganda, bu hujum isroillik harbiylar G‘azoda amaliyot o‘tkazishi va HAMASning 7 nafar vakili, shu jumladan qo‘mondonlardan birini o‘ldirishiga javoban amalga oshirilgan. Shundan keyin Isroil harbiy samolyotlari G‘azo sektoridagi obektlar bo‘ylab zarbalar berdi.