Erkin iqtisodiy zonalarni rivojlantirish konsepsiyasi ishlab chiqiladi

O‘zbekiston Respublikasi Prezidentining “Erkin iqtisodiy zonalar faoliyatini muvofiqlashtirish va boshqarish tizimini yanada takomillashtirish chora-tadbirlari to‘g‘risida”gi farmoni imzolandi.

Farmonga ko‘ra, 2019 yilda erkin iqtisodiy zonalarning avtomobil yo‘llari, suv ta'minoti va kanalizatsiya tarmoqlarini qurish va ta'mirlash bo‘yicha “Yo‘l xaritasi”, Qoraqalpog‘iston Respublikasi, viloyatlar va Toshkent shahridagi erkin iqtisodiy zonalar va kichik sanoat zonalari ma'muriy kengashlarining yangilangan namunaviy tarkibi tasdiqlanmoqda.

O‘zbekiston Respublikasi Investitsiyalar bo‘yicha davlat qo‘mitasi Iqtisodiyot vazirligi bilan birga 2019 yilning 1 apreliga qadar quyidagilarni nazarda tutuvchi Erkin iqtisodiy zonalarni rivojlantirish konsepsiyasi loyihasini ishlab chiqishi va kiritishi belgilanmoqda:

• erkin iqtisodiy zonalarning ixtisoslashuvi, investitsiya loyihalarini tanlab olishning aniq mezonlari, berilayotgan imtiyozlar va davlat ko‘magining boshqa shakllarini belgilash;
• investorlarni jalb qilish maqsadida erkin iqtisodiy zonalar hududida zarur shart-sharoitlar yaratish, shu jumladan, muhandislik-transport infratuzilmasi, ijtimoiy-maishiy va madaniy-jamoatchilik obektlar bilan ta'minlanganlik darajasini yaxshilash;
• erkin iqtisodiy zonalarning boshqarish tizimini, shu jumladan, direksiyalar faoliyatini tashkil etishda yagona standartlarni belgilash, ko‘rsatilayotgan xizmatlarning ro‘yxatini kengaytirish, shuningdek, erkin iqtisodiy zonalar direksiyalarini tadbirkorlik sub'yektlari, shu jumladan, xorijiy kompaniyalarga ishonchli boshqaruvga berish yo‘li bilan takomillashtirish;

Investitsiyalar bo‘yicha davlat qo‘mitasi Adliya vazirligi bilan birgalikda bir oy muddatda Vazirlar Mahkamasiga Ma'muriy kengashlar va erkin iqtisodiy zonalarning direksiyalari faoliyatini tashkil etish to‘g‘risidagi nizomni tasdiqlash bo‘yicha hukumat qarori loyihasini kiritadi, unda erkin iqtisodiy zonalarning vazirlik, idoralar, tashkilotlar va mahalliy davlat hokimiyati organlari bilan o‘zaro hamkorligi tartibini nazarda tutiladi;

Ma'muriy kengashlar va erkin iqtisodiy zonalarning direksiyalari bilan birgalikda ikki oy muddatda:

• samarasiz foydalanilayotgan yer uchastkalarini qaytargan holda, erkin iqtisodiy zonalar ishtirokchilari bilan yerdan foydalanish shartnomalarini qayta ko‘rib chiqish yoki qo‘shimcha loyihalarni amalga oshirish hisobiga yerdan oqilona foydalanish bo‘yicha “yo‘l xaritalari”ni ishlab chiqish;
• erkin iqtisodiy zonalarning belgilangan muddatlarda investitsiya loyihalarini amalga oshirishni boshlamagan ishtirokchilari bilan kelishuvlarni bekor qilish;
• qisqa muddatlarda ishlab chiqarishni yo‘lga qo‘yishni hisobga olib, qoloq loyihalar bo‘yicha tarmoq jadvallarini tuzishni ta'minlaydi;

Investitsiyalar bo‘yicha davlat qo‘mitasi O‘zbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda bir oy muddatda:

• buyurtmachilar tomonidan birlamchi ma'lumotlarni Internet tarmog‘i orqali raqamli imzodan foydalangan holda kiritish, shuningdek, loyihalarni muayyan mezonlar asosida qat'iy belgilangan aniq avtomatik algoritm bo‘yicha baholash imkonini beradigan, erkin iqtisodiy zonalar hududida loyihalarni amalga oshirish uchun arizalarni ma'muriy kengashlar tomonidan ko‘rib chiqishning elektron tizimini;
• erkin iqtisodiy zonalar ishtirokchilarining ishlab chiqarish quvvatlarini o‘z vaqtida ishga tushirishi, mahsulotlarni eksport qilishi, yangi ish o‘rinlari yaratishi hamda investitsiyaviy majburiyatlarni bajarishi ustidan tezkor nazorat olib borish imkonini beruvchi erkin iqtisodiy zonalar hududida investitsiya loyihalarini monitoring qilishning avtomatlashtirilgan tizimini;
• mazkur Farmon talablari, shuningdek, O‘zbekiston Respublikasi Prezidentining 2017 yil 25 oktyabrdagi “Erkin iqtisodiy zonalar va kichik sanoat zonalari faoliyati samaradorligini oshirish borasidagi qo‘shimcha chora-tadbirlar to‘g‘risida”gi PQ-3356-son qarori 12-bandi talablarini hisobga olgan holda, O‘zbekiston Respublikasi erkin iqtisodiy zonalari yagona portalining yangilangan versiyasini ishlab chiqadi va joriy etadi;

Investitsiyalar bo‘yicha davlat qo‘mitasi Iqtisodiyot vazirligi va Adliya vazirligi bilan birgalikda 2019 yilning 1 martiga qadar erkin iqtisodiy zonalar bo‘yicha qabul qilingan qonunchilik bazasini xatlovdan o‘tkazadi va to‘g‘ridan-to‘g‘ri amal qiladigan “Maxsus iqtisodiy zonalar to‘g‘risida”gi O‘zbekiston Respublikasi Qonuni loyihasini O‘zbekiston Respublikasi Vazirlar Mahkamasiga kiritadi va unda ushbu Farmon qoidalari hamda keyinchalik o‘z kuchini yo‘qotadigan O‘zbekiston Respublikasining “Erkin iqtisodiy zonalar to‘g‘risida”gi Qonuni normalarini nazarda tutadi;