AQSh qo‘shinlarining Suriyadan olib chiqilishi haqidagi farmon imzolandi

AQShning iste'foga ketayotgan mudofaa vaziri Jyeyms Mettis AQSh qo‘shinlarining Suriyadan olib chiqilishi haqidagi farmonni imzoladi. Bu haqda o‘z manbalariga iqtibos keltirgan holda CNN telekanali ma'lum qildi.  

Farmonda qo‘shinlarning qanday yo‘sinda va qachon olib chiqilishi ko‘rsatilgan, biroq telekanal bu ma'lumotni oshkor qilmagan.

Avvalroq AQSh prezidenti Donald Tramp IShID ustidan g‘alaba qozonilgani munosabati bilan Suriyadan qo‘shinlarning olib chiqilishini e'lon qilgandi. Trampning bu qarori nafaqat AQShning ittifoqdoshlari, balki AQSh kongressi a'zolari uchun kutilmagan qaror bo‘lgan. Bir qator nufuzli senatorlar ma'muriyatning bu qaroriga qarshi chiqishgan. Oq uyda Tramp o‘z qarorini o‘zgartirishi istisno qilingan.

Hozirda Suriyada 2600 ga yaqin amerikalik harbiy bor. Tramp millatga murojaatida ularni “butun dunyo qahramonlari” deb atagan.