Doimiy propiska qilish va propiskadan chiqarishga doir davlat xizmatini ko‘rsatishning ma'muriy reglamenti tasdiqlanadi
|20:11 / 26.12.201815 61812 min
Foto: KUN.UZFoto: KUN.UZ
Normativ-huquqiy hujjatlar loyihalari muhokamasi portalida Vazirlar Mahkamasining “Fuqarolarni doimiy propiska qilish va propiskadan chiqarishga doir davlat xizmatini ko‘rsatishning ma'muriy reglamentini tasdiqlash to‘g‘risida”gi qarori loyihasi joylashtirildi.
Ma'muriy reglamentga ko‘ra, davlat xizmati Davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali orqali O‘zbekiston Respublikasi Ichki ishlar vazirligi tomonidan ko‘rsatiladi.
Fuqarolarni doimiy propiska qilish va propiskadan chiqarish aholi migratsiyasini hisobga olish maqsadida fuqaroning viloyat hududining muayyan joyida yashashi faktini aniqlashni nazarda tutadi.
Fuqarolar qonun hujjatlariga muvofiq doimiy yashash joylarida propiskadan o‘tishlari shart.
Fuqarolar doimiy propiskadan chiqqan kundan boshlab (yangi yashash joyiga kelgan kundan boshlab) o‘n kun ichida doimiy propiskada turish uchun murojaat qilishlari lozim.
O‘n olti yoshga to‘lmagan shaxslarni doimiy propiska qilish ularning ota-onalari yoki ularning o‘rnini bosuvchi shaxslarning xohishiga qarab ixtiyoriy asosda amalga oshiriladi.
Mazkur davlat xizmatini kontrakt bo‘yicha harbiy xizmatchining shaxsiy guvohnomasi yoki O‘zbekiston Respublikasi Qurolli Kuchlari ofitserining shaxsiy guvohnomasi (kazarmalar, korabllar va kemalardan tashqarida yashaydigan harbiy xizmatchilar uchun) bo‘lgan fuqarolarga ko‘rsatish to‘g‘ridan-to‘g‘ri tegishli hududdagi migratsiya va fuqarolikni rasmiylashtirish bo‘limi tomonidan amalga oshiriladi.
Tarbiyalash, davolash va boshqa muassasalardagi yetim bolalar, ota-onalarining qarovisiz qolgan bolalar, shuningdek qariyalar uylaridagi shaxslar ko‘rsatib o‘tilgan muassasalar tomonidan berilgan turar joy maydoniga doimiy propiska qilinadi.
Davlat xizmatlari markazlari va vakolatli organ o‘rtasidagi axborot almashinuvi elektron raqamli imzoni majburiy tartibda qo‘llash orqali faqat idoralararo elektron o‘zaro bog‘lanish yordamida amalga oshiriladi.
Fuqaro viloyatlarda doimiy propiskaga ega bo‘lish uchun propiska qilinayotgan hududdagi tuman (shahar) Davlat xizmatlari markaziga (o‘zi kelib murojaat qilganda) yoki Yagona interaktiv davlat xizmatlari portali orqali turar joy egasi bilan birga elektron tarzda murojaat qiladi.
Fuqaro kela olmaydigan hollarda turar joy egasining o‘zi fuqaroning pasporti bilan birga murojaat qilishi mumkin.
Mavzuga oid
Davlat xizmatlari markazi orqali murojaat qilingan hollarda fuqaro va turar joy egasi nomidan Davlat xizmatlari markazi xodimi tomonidan, YaIDXP orqali murojaat etgan taqdirda esa, mustaqil ravishda muvofiq shakldagi so‘rovnoma elektron ravishda to‘ldiriladi.
So‘rovnomaga qo‘shimcha ravishda quyidagi hujjatlar kiritiladi:
uy-joy hujjatlarining kadastr raqamlari tizimga kiritilib, asli qaytariladi;
nikoh tuzilganligi yoki bolalar tug‘ilganligi to‘g‘risidagi guvohnomalar, shuningdek vasiylik yoki homiylikni tasdiqlaydigan hujjatlarning tegishli raqamlari tizim orqali tekshirilgan holda asli qaytariladi;
uy-joy mulkdorining (mulkdorlarining) turar joy maydoni berish to‘g‘risidagi roziligini shaxsan o‘zi berish imkoni mavjud bo‘lmasa, notarial tasdiqlangan arizasi (roziligi) reyestr raqami tizim orqali tekshirilgan holda qaytariladi.
Mazkur xizmat harbiy xizmatga majburlar uchun ko‘rsatilayotganda so‘rovnomada harbiy ro‘yxatdan chiqarish va kiritishga taalluqli ma'lumotlar ham to‘ldiriladi.
Bunda harbiy xizmatga majburlarning harbiy guvohnomalari (chaqiriluvchilarning qayd etilganligi to‘g‘risidagi guvohnomalari) raqamlari so‘rovnomaga kiritiladi.
Turar joy mulkdori o‘z oila a'zolarini va boshqa shaxslarni propiskadan o‘tkazish huquqiga ega.
Uy-joy mulkdori (mulkdorlari) nomidan notarial tasdiqlangan ishonchnoma orqali harakatlanayotgan shaxslar ham fuqaroni doimiy propiska qilishga rozilik berish uchun murojaat qilishga haqli.
Bir nechta uyga yoki kvartiraga ega bo‘lgan mulkdor ulardan faqat bittasiga doimiy propiskadan o‘tishi mumkin.
Zarur ma'lumotlar so‘rovnomaga kiritilgandan so‘ng, fuqaro va uy-joy mulkdori (mulkdorlari) uni o‘zlarining elektron raqamli imzo kalitlari bilan tasdiqlaydilar.
ERI kaliti bo‘lmagan hollarda tegishli imzolar identifikatsiya qilishning boshqa vositalari (daktiloskopiya, elektron imzo va boshqalar) bilan ham tasdiqlanishi mumkin.
Davlat xizmatlari ko‘rsatish uchun eng kam oylik ish haqining 10 foizi miqdorida davlat boji undiriladi.
Davlat xizmatini ko‘rsatish uchun davlat boji to‘langanligini tasdiqlash axborot-kommunikatsiya tizimlari orqali amalga oshiriladi.
Yig‘imlar summasi quyidagi tartibda taqsimlanadi:
40 foizi – O‘zbekiston Respublikasi Ichki ishlar vazirligi MvaFRBBning budjetdan tashqari jamg‘armasining shaxsiy hisob raqamiga o‘tkaziladi;
20 foizi – O‘zbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamg‘armasining shaxsiy hisob raqamiga o‘tkaziladi;
10 foizi – O‘zbekiston Respublikasi Axborot texnologiyalari va kommunikatsiyalarini rivojlantirish vazirligining maxsus hisob raqamiga o‘tkaziladi (xizmat YaIDXP orqali ko‘rsatilganda);
qolgan mablag‘lar to‘liq miqdorda Davlat budjetiga o‘tkaziladi.
So‘rovnomada noto‘g‘ri ma'lumotlar ko‘rsatilishi (kadastr hujjatlari, pasport ma'lumotlari, notarial tasdiqlangan rozilik xati) shuningdek, davlat xizmatlari ko‘rsatish uchun davlat bojini to‘lamaslik davlat xizmati ko‘rsatishni rad etish uchun asos hisoblanadi.
Ariza beruvchi davlat xizmatidan foydalanishdan uni ko‘rsatishning har qanday bosqichida bosh tortish huquqiga ega.
Ariza beruvchi davlat xizmatidan foydalanishdan bosh tortganda uning so‘rovnomasi ko‘rmasdan qoldiriladi. Bunda, to‘langan davlat boji summasi qaytarilmaydi.
O‘zi kelib murojaat etganda Davlat xizmatlari markazlari so‘rovnomani vakolatli organga hamda tegishli mudofaa ishlari bo‘yicha bo‘limiga elektron tizim orqali yuboradi.
YaIDXP orqali murojaat qilinganda esa so‘rovnoma avtomatik tarzda vakolatli organga hamda mudofaa ishlari bo‘yicha bo‘limga yuboriladi.
Harbiy xizmatga majbur shaxslarni propiska qilish ular mudofaa ishlari bo‘yicha bo‘limlarda harbiy hisobga qo‘yilganlaridan keyin amalga oshiriladi.
So‘rovnoma vakolatli organning elektron tizimiga kelib tushgan vaqtdan boshlab 1 ish kuni davomida fuqaro haqidagi ma'lumotlar tegishli ma'lumotlar bazalari orqali tekshiriladi.
Tekshirish natijasiga ko‘ra, fuqaroni doimiy propiska qilish mumkinligi to‘g‘risidagi xabar vakolatli organning elektron tizimi orqali rasmiylashtirilgan va QR-kod (matrik shtrixli kod) bilan tasdiqlangan holda tegishli mudofaa ishlari bo‘yicha bo‘limiga yuboriladi.
Mudofaa ishlari bo‘yicha bo‘limi vakolatli organning mazkur xabariga asoslangan holda fuqaroni 1 ish kuni davomida harbiy ro‘yxatdan chiqarish va kiritish bo‘yicha davlat xizmatlari ko‘rsatadi hamda bu haqda tegishli vakolatli organni elektron tizim orqali xabardor qiladi.
Vakolatli organ mudofaa ishlari bo‘yicha bo‘limning xabariga asoslangan holda 1 ish kuni davomida fuqaroning propiska qilinganligi haqidagi xabarnomani (xabarnoma vakolatli organning elektron tizimi orqali rasmiylashtirilgan va QR-kod (matrik shtrixli kod) bilan tasdiqlanadi) Davlat xizmatlari markaziga (o‘zi kelib murojaat etgan taqdirda) yoki ariza beruvchiga (elektron tarzda murojaat etgan taqdirda) YaIDXP orqali elektron ravishda yuboriladi.
Davlat xizmatlari markazi, xabarnoma kelib tushgan kunning o‘zidayoq uni ariza beruvchining elektron manziliga yuboradi va ariza beruvchini bu haqda axborot-kommunikatsiya tizimi orqali xabardor qiladi.
Fuqaroning so‘roviga ko‘ra, unga xabarnoma qog‘oz shaklda murojaat qilgan Davlat xizmatlari markazining muhri bilan tasdiqlangan holda taqdim etilishi mumkin.
Fuqaro xabar kelib tushgan kundan e'tiboran, 10 kun ichida pasporti bilan birga doimiy propiska qilinayotgan hududdagi migratsiya va fuqarolikni rasmiylashtirish bo‘limiga – doimiy propiska qilish muhrini qo‘ydirish uchun, mudofaa ishlari bo‘yicha bo‘limiga – harbiy hisobga qo‘yish muhrini qo‘ydirish uchun murojaat qiladi.
Migratsiya va fuqarolikni rasmiylashtirish bo‘limi fuqaroning pasportiga murojaat qilgan kunning o‘zidayoq doimiy propiskadan chiqarish hamda propiska qilish to‘g‘risidagi tegishli muhrlarni qo‘yadi.
Mudofaa ishlari bo‘yicha bo‘limi fuqaroning harbiy guvohnomasiga murojaat qilgan kunning o‘zida harbiy hisobdan chiqarish hamda harbiy hisobga qo‘yish to‘g‘risidagi tegishli muhrlarni qo‘yadi.
Fuqaro ro‘yxatdan chiqish uchun propiska qilinayotgan hududdagi tuman (shahar) Davlat xizmatlari markaziga (o‘zi kelib murojaat qilganda) yoki Yagona interaktiv davlat xizmatlari portali orqali elektron tarzda murojaat qiladi.
Davlat xizmatlari markazi orqali murojaat qilingan hollarda fuqaro nomidan Davlat xizmatlari markazi xodimi tomonidan, YaIDXP orqali murojaat etgan taqdirda esa, mustaqil ravishda muvofiq shakldagi so‘rovnoma elektron ravishda to‘ldiriladi.
So‘rovnomaga qo‘shimcha ravishda quyidagi hujjatlar kiritiladi:
pasport yoki tug‘ilganlik to‘g‘risidagi guvohnomaning tegishlii raqamlari (pasport seriyalari) tizimga kiritilib, asli qaytariladi;
harbiy (chaqiriluvchilarning qayd etilganligi to‘g‘risidagi) guvohnomalarning tegishli raqamlari tizimga kiritilib, asli qaytariladi (harbiy xizmatga majburlar uchun).
Ozodlikdan mahrum etishga hukm qilingan shaxslarni, vafot etganlar, sud qaroriga asosan propiskadan chiqarilayotgan hollar va ushbu ma'muriy reglamentga asosan Davlat xizmatlari markazlari orqali ko‘rsatilishi nazarda tutilmagan boshqa hollarda tegishli xizmatlar vakolatli organ tomonidan to‘g‘ridan to‘g‘ri qonunchilik talablari asosida amalga oshiriladi.
Mazkur xizmat harbiy xizmatga majburlar uchun ko‘rsatilayotganda so‘rovnomada harbiy ro‘yxatdan chiqarish va kiritishga taalluqli ma'lumotlar ham to‘ldiriladi.
Bunda harbiy xizmatga majburlarning harbiy (chaqiriluvchilarning qayd etilganligi to‘g‘risidagi) guvohnomalari raqamlari so‘rovnomaga kiritiladi.
Zarur ma'lumotlar so‘rovnomaga kiritilgandan so‘ng, fuqaro uni o‘z ERIsi bilan tasdiqlaydi.
ERI kaliti bo‘lmagan hollarda tegishli imzolar identifikatsiya qilishning boshqa vositalari (daktiloskopiya, elektron imzo va boshqalar) bilan ham tasdiqlanishi mumkin.
Davlat xizmatlari ko‘rsatish uchun eng kam oylik ish haqining 10 foizi miqdorida davlat boji undiriladi.
Davlat xizmatini ko‘rsatish uchun davlat boji to‘langanligini tasdiqlash axborot-kommunikatsiya tizimlari orqali amalga oshiriladi.
So‘rovnomada noto‘g‘ri ma'lumotlar ko‘rsatilishi (kadastr hujjatlari, pasport ma'lumotlari, notarial tasdiqlangan rozilik xati) shuningdek, davlat xizmatlari ko‘rsatish uchun davlat bojini to‘lamaslik davlat xizmati ko‘rsatishni rad etish uchun asos hisoblanadi.
Boshqa har qanday holat xizmatni ko‘rsatishni rad etishga asos bo‘lmaydi.
