Roʻyxat tuzuvchilarining qayd etishicha, 2026-yilgi roʻyxat «bu sohaning jadal rivojlanayotgan holatini aks ettiradi» – unda sohadagi eng yirik kompaniyalar asoschilari va SI tadqiqotchilari bilan bir qatorda, ushbu texnologiyaning u yoki bu jihatlarini faol tanqid qiluvchilar ham bor. Time sunʼiy intellekt sohasidagi eng nufuzli shaxslar roʻyxatini 2023-yildan beri eʼlon qilib keladi.
Time roʻyxatdagi barcha ishtirokchilarni toʻrtta toifaga ajratdi. Birinchi, «yetakchilar» toifasiga, xususan, OpenAI hammuassisi Sem Altman, SpaceX bosh direktori Ilon Mask, Anthropic asoschilari Dario va Daniela Amodei, Amazon asoschisi Jeff Bezos kirdi.
Ikkinchi, «innovatorlar» toifasi ishtirokchilari orasida amerikalik aktyor, rejissyor va kinoda sunʼiy intellektni qoʻllashga moʻljallangan InterPositive startapining yaratuvchisi Ben Afflek hamda Xitoyning Moonshot AI kompaniyasi asoschisi Yan Chjilin bor.
Uchinchi toifa - «SI sohasini shakllantiruvchilar» (shapers). Bu roʻyxatdan aktrisa Peris Hilton (dipfeyklarga qarshi kurashi uchun), amerikalik siyosatchi Berni Sanders (sunʼiy intellektning mehnat bozoriga va umuman jamiyatga salbiy taʼsirini tanqid qilgani uchun), investor va AQSH prezidentining fan va texnologiyalar boʻyicha maslahatchilar kengashi hamraisi Devid Saks oʻrin olgan.
Toʻrtinchi, «mutafakkirlar» toifasiga, jumladan, OpenAI hammuassisi va xavfsiz superintellektni rivojlantirishga qaratilgan Safe Superintelligence startapi yaratuvchisi Ilya Sutskever, sunʼiy intellektni ishlab chiqish va uning inson bilan hamkorligiga yoʻnaltirilgan Thinking Machines startapi asoschisi Mira Murati hamda Nvidia korporatsiyasining barqarorlik boʻyicha direktori Josh Parker kiritildi.
