«Real» 18 yoshli hujumchini ijaraga oldi

«Melilya» hujumchisi Muhammad Mizzian «Real» a'zosiga aylandi.

«Melilya» rasmiy saytining tasdiqlashicha, Madrid klubi 18 yoshli futbolchini mavsum oxiriga qadar ijaraga olgan.

Ispan nashrlariga ko‘ra, «qaymoqranglilar» Mizzianni bir necha oy davomida kuzatib kelishgan. Hujumchi dekabr oyi boshida ikki klubning Ispaniya kubogi 1/16 final bosqichidagi bahsida ham «Real» mutaxassislari e'tiborida bo‘lgan. U o‘sha uchrashuvda asosiy tarkibda maydonga tushib, tanaffus vaqtida almashtirilgan edi.

Katta ehtimol bilan Muhammad Mizzian «Kastilya» safiga qo‘shiladi. Ammo u jarohat olib safdan chiqqan Mariano Diasning o‘rniga asosiy jamoaga ham jalb etilishi ham mumkin.

Mizzianga «Barselona» ham befarq qaramayotgani haqida xabarlar bor edi. Futbolchi fevralda 18 yoshini qarshi oladi.