Bog‘chalar tomonidan qo‘shimcha pulli xizmatlar ko‘rsatish joriy etiladi

O‘zbekistonda davlat maktabgacha ta'lim muassasalari tomonidan qo‘shimcha pulli xizmatlar ko‘rsatish joriy etiladi. Bu haqda 2017–2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi loyihasida aytilgan.

Ta'kidlanishicha, tegishli normativ-huquqiy hujjat loyihasi ishlab chiqiladi. Loyihada:

davlat maktabgacha ta'lim muassasalari tomonidan dam olish kunlari va ish kuni yakunlangandan keyin bolani parvarishlash, unga qarab turish va o‘qitish;

belgilangan dasturdan tashqari sport-sog‘lomlashtirish (karate, taekvondo, suzish, shaxmat, shashka, gimnastika, massaj va boshqalar) to‘garaklari, badiiy-estetik, fan to‘garaklari  tashkil etib, qo‘shimcha xizmatlar ko‘rsatish nazarda tutiladi.

Bajarish muddati - 2019 yil 1 mart, ijro uchun mas'ullar - Maktabgacha ta'lim vazirligi, Moliya vazirligi, Adliya vazirligi, Ta'lim sifatini nazorat qilish davlat inspeksiyasi.