Namangan viloyati Uchqoʻrgʻon tumanida amalda faoliyat yuritmagan maktabgacha taʼlim tashkilotlarini rasmiylashtirib, 1,3 mlrd soʻmlik subsidiya mablagʻlarini oʻzlashtirish holati aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Departamentning Uchqoʻrgʻon tumani boʻlimi tomonidan oʻtkazilgan tergovga qadar tekshiruvda tuman maktabgacha va maktab taʼlimi boʻlimi masʼul shaxslari va boshqalar oʻzaro til biriktirgani aniqlangan.
Ular Mehnatobod va Dehqonobod mahallalaridagi xonadonlarda maktabgacha taʼlim tashkilotlarini davlat roʻyxatidan oʻtkazgan. Biroq mazkur MTTlar amalda faoliyat yuritmagan.
Shunga qaramay, rasmiy hujjatlarga soxta maʼlumotlar kiritilib, ushbu tashkilotlarga 1,3 mlrd soʻmlik subsidiya mablagʻlari ajratilgan. Ushbu mablagʻlar oʻzlashtirish yoki rastrata yoʻli bilan talon-toroj qilingan.
Holat yuzasidan Jinoyat kodeksining 167-moddasi (Oʻzlashtirish yoki rastrata yoʻli bilan talon-toroj qilish), 207-moddasi (Mansabga sovuqqonlik bilan qarash) va 209-moddasi (Mansab soxtakorligi) bilan jinoyat ishi qoʻzgʻatilgan.
Hozirda tergov harakatlari olib borilmoqda.
