«Real»ning sobiq bosh murabbiyi Zinedin Zidan yozda «Yuventus» bosh murabbiyi etib tayinlanishi mumkin, deb xabar bermoqda Mundo Deportivo.
Nashrning aniqlashicha, Turin klubining amaldagi bosh murabbiyi Massimiliano Allegri, 2020 yil yozigacha mo‘ljallangan shartnomasi bo‘lsa-da, shu mavsum yakunida lavozimini tark etishni rejalashtirmoqda. Uning o‘rnini esa Zidan egallashi kutilyapti.
Eslatib o‘tamiz, Allegri «Yuventus»da 2014 yil iyulidan buyon ishlab kelmoqda. Uning qo‘l ostida «keksa sinora» to‘rt karra Italiya chempioni va kubogi sohibi bo‘ldi, bir marotaba Italiya superkubogida g‘olib chiqdi.
Zidan esa 2017/18 mavsumi oxiridan buyon ishsiz qolmoqda. U Madrid klubini ketma-ket uch marotaba YeChLda chempionlik sari boshlab borgan edi. Fransiyalik sobiq yarimhimoyachi 1996-2001 yillar oralig‘ida «Yuve» libosida to‘p surgan.
