Bugun limonli suv haqida deyarli hamma biladi – u hatto ko‘plab restoranlarda oddiy suvning bepul muqobil varianti sifatida taklif etiladi. Bu ichimlikning mashhurligi sababi nimada va u qanday xususiyatlarga ega?
Ayrim kishilar uning ta'mi yoqimli bo‘lgani sabab ichishsa, boshqalar esa sog‘lomlashtiruvchi ta'siri sabab uni o‘z ratsionlariga kiritishadi. To‘g‘risini aytganda, hozircha limonli suvning inson organizmiga ta'siri mavzusida u qadar ko‘p tadqiqotlar o‘tkazilmagan. Biroq bu ichimlikning ikki tarkibiy qismi – suv va limonning alohida xususiyatlari haqida ma'lumotlar talaygina.
Limonli suv ishtiyoqmandlari u bir necha foydali ta'sirlarga egaligini ta'kidlaydilar. Keling, limonli suvni har kuni ichishni boshlasangiz qanday o‘zgarishlar yuz berishi mumkinligiga oydinlik kiritamiz.
Vaznning kamayishi
Yaqinda o‘tkazilgan tadqiqotlar limon tarkibidagi polifenol antioksidantlar vazn kamayishiga hissa qo‘shishini ko‘rsatgan.
Limonli suv ichadigan kishilar ozishda hech qanday qiyinchilikni his etmasliklarini aytishgan.
Suv muvozanati
O‘zini yaxshi his etish uchun yetarli miqdorda suv ichishning o‘zi kifoya. U tufayli organizm ichki muhitining nisbiy doimiyligi, termoregulyatsiya va metabolizm toksik mahsulotlarining chiqarilishi ta'minlanadi. O‘rtacha katta odam kuniga 2,7 dan 3,7 litrgacha suv ichishi kerak. Suyuqlikning ayrim miqdorini biz taomdan olamiz, biroq katta qismi organizmga suv ko‘rinishida tushishi kerak. Biroq hamma ham suv ichishga o‘zini majbur qilolmaydi.
Suvga limon tomchisining qo‘shilishi uning ta'mini yaxshilab, ko‘proq ichishga ishtiyoq uyg‘otadi deb hisoblanadi.
S vitamini
S vitamini salomatlik uchun juda muhim antioksidant. Uni faqat yegulik orqali olish mumkin. Chunki organizm uni mustaqil tarzda ishlab chiqarolmaydi. Agar S vitaminini yetarli darajada olsangiz, u yurak qon-tomir kasalliklari, insult va gipertoniya ehtimolini kamaytirishda yordam beradi. Ayrim tadqiqotlarga ko‘ra, u shamollash kasalliklaridan tezroq tuzalishga yordam beradi, shuningdek teri holatiga ham ijobiy ta'sir ko‘rsatadi.
