O‘zbekiston limon eksportini oshirdi: asosiy xaridorlar Qozog‘iston va Rossiya

O‘zbekiston 2025 yil yanvar–noyabr oylarida 11 ta xorijiy davlatga qiymati 5,4 mln AQSh dollariga teng bo‘lgan 3,8 ming tonna limon eksport qilgan. Ko‘rsatkich o‘tgan yilning mos davriga nisbatan 764 tonnaga yoki 25 foizga oshgan.

Foto: Kun.uz

Milliy statistika qo‘mitasi ma’lumotlariga ko‘ra, mazkur davrda O‘zbekiston limonni eng ko‘p Qozog‘istonga yetkazib bergan — 1 827 tonna. Ikkinchi yirik xaridor sifatida Rossiya qayd etilgan — 1 740 tonna. Shu tariqa, eksportning asosiy qismi aynan ushbu ikki bozor hissasiga to‘g‘ri kelgan.

Shuningdek, Qirg‘izistonga 236,5 tonna limon eksport qilingan. Belarusga 4,7 tonna, Birlashgan Arab Amirliklariga 3,8 tonna, boshqa davlatlarga esa 3,9 tonna limon yetkazib berilgan.

Qayd etilishicha, limon eksportidagi o‘sish tashqi bozorlarda mahsulotga talab saqlanib qolayotganini ko‘rsatadi. Statistik ma’lumotlar asosida, O‘zbekiston limon eksport geografiyasini bosqichma-bosqich kengaytirib borayotgan bo‘lsa-da, asosiy xaridorlar sifatida Qozog‘iston va Rossiya yetakchilikni saqlab qolmoqda.