2030 yilda O‘zbekistonga 117 milliard kVt/s elektroenergiya kerak bo‘ladi – «O‘zbekenergo»​

2030 yilga qadar, O‘zbekistonda elektroenergiyaga bo‘lgan talab 117 milliard kVt/s ga yetib borishi taxmin qilinmoqda. Ayni paytda esa «O‘zbekenergo»​ AJ yiliga 56-58 milliard kVt/s energiya ishlab chiqarmoqda. Bu haqda jamiyat boshqaruv raisi birinchi o‘rinbosari Ruslan Mubarakshin Kun.uz'ga ma'lum qildi.

«Respublika bo‘ylab, energiya ishlab chiqarish umumiy quvvati 14,1 ming megavattni tashkil etadi. Shundan faqat 12 ming megavatt energiya ishlab chiqarish salohiyati «O‘zbekenergo»​ga tegishli. Bundan tashqari, gidroenergiya va generatsiya manbasiga ega turli korxonalar mavjud. Mustaqillik yillarida ishlab chiqarish quvvati 3 ming megavattdan ortiq darajaga oshdi. 2021 yilga qadar ishlab chiqarish quvvat 1,8 ming megavattga oshishi belgilangan»​, – deydi Ruslan Mubarakshin. 

Shunga qaramay, respublikada energiyaga bo‘lgan talab kun sayin ortib bormoqda. Mubarakshinnig aytishicha, 2030 yilga borib, O‘zbekistonda elektroenergiyaga bo‘lgan talab 117 milliard kVt/s ga yetib boradi. Ayni paytda kompaniya avvalgi yil hisoboti bilan solishtirganda 20-30 million kVt oshiqcha energiya ishlab chiqaryapti.

«Barcha stansiyalar to‘liq ish quvati bilan ishlayapti, bundan tashqari qo‘shimcha-zaxira kuchlarimiz ham bor. Asosiy muammo – yoqilg‘i yetishmasligida. Har yili energiyaga bo‘lgan talab 3-4 foizga oshib bormoqda. Biz buni qoplayapmiz. Hukumat tomonidan oldimizga qo‘yilgan vazifa ham shu: zaxira quvvatlarini oshirish va barqarorlikni ta'minlash»​, – deydi u.

Ma'lumot uchun, O‘zbekiston Respublikasi Prezidentining tarkibiy o‘zgarishlar, ishlab chiqarishni modernizatsiyalash va diversifikatsiya qilish bo‘yicha farmoniga muvofiq «O‘zbekenergo»​ AJ da 2018 yildan 2021 yilgacha bo‘lgan davrda umumiy qiymati 11 mlrd. AQSh dollariga teng 52 ta investitsion loyihalarni amalga oshirish nazarda tutilmoqda.