Boshqaruv organlari rahbarlarining bo‘sh lavozimlariga xotin-qizlar tavsiya etiladi

Endilikda boshqaruv organlari rahbarlarining bo‘sh lavozimlariga xotin-qizlarni tavsiya etishga alohida e'tibor qaratiladi. O‘zbekiston Respublikasi Bosh vazir o‘rinbosari, Xotin-qizlar qo‘mitasi raisi Tanzila Norboyeva ijtimoiy tarmoqlardagi sahifasida shu mazmundagi ma'lumot bilan bo‘lishdi.

Prezidentning “Mamlakatni ijtimoiy-iqtisodiy rivojlantirishning strategik vazifalari amalga oshirilishi samaradorligi uchun O‘zbekiston Respublikasi Vazirlar Mahkamasining mas'uliyatini oshirishga doir birinchi navbatdagi chora-tadbirlar to‘g‘risida”gi farmoniga asosan endi tegishli davlat boshqaruvi organlari rahbarlarining bo‘sh lavozimlariga xotin-qizlarni tavsiya etishga alohida e'tibor qaratiladi. Farmonda nomzodlar zahirasini puxta ishlab chiqish, asoslash va ko‘rib chiqish uchun O‘zbekiston Prezidentiga taqdim etish topshirilgan.

Bugungi kunda Xotin-qizlar Qo‘mitasi tomonidan rahbarlik lavozimlariga tavsiya etish uchun 3 mingdan ortiq kadrlar zahirasi shakllantirilgan. Qo‘mita Prezident huzuridagi Davlat va jamiyat qurilish akademiyasi va uning hududiy bo‘limlarida o‘quv kurslarini joriy qilib, mazkur sohada ayollarning salohiyatlarini yanada rivojlantirishni maqsad qilgan.

"Biz ayollarning ushbu sohada salohiyatini yanada oshirish uchun barcha imkoniyatlarimizni safarbar etamiz. Fevral oyidan e'tiboran Prezident huzuridagi Davlat va jamiyat qurilish akademiyasi va uning hududiy bo‘linmalarida o‘quv kurslari joriy qilinadi. Ushbu uzoq kutilgan yangilik biz uchun gender tenglikni ta'minlashda jiddiy qadam bo‘lib xizmat qiladi", - deb yozadi Tanzila Norboyeva.