Prezidentning «Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida»gi qaroriga muvofiq, talaba xotin-qizlarning kontrakt toʻlovlarini mahalliy hokimliklar hisobidan qoplab berish tartibi belgilangan.
Unga koʻra, har yili har bir viloyatdan jami 150 nafar talaba xotin-qizning kontrakt puli toʻlab beriladi.
Ularning 40 nafari birinchi kursda, 100 nafari esa ikkinchi va undan yuqori kurslarda tahsil olayotgan talaba xotin-qizlar boʻlishi kerak.
Mazkur imtiyozdan «Ijtimoiy himoya yagona reyestri»ga kiritilgan kam taʼminlangan oilalarning qizlari foydalanishi mumkin.
Shuningdek, yetim yoki ota-ona qaramogʻidan mahrum boʻlgan talaba qizlar hamda voyaga yetmagan farzandlarini yolgʻiz tarbiyalayotgan yoki boquvchisini yoʻqotgan ayollarning qizlari ham kontrakt toʻlovini qoplab berish uchun talabgor boʻlishi mumkin.
Biroq ushbu imkoniyat ikkinchi mutaxassislik boʻyicha taʼlim olayotganlarga tatbiq etilmaydi.
Shuningdek, Oʻzbekistonda faoliyat yuritayotgan xorijiy yoki xususiy oliy taʼlim muassasalarida tahsil olayotgan talaba xotin-qizlarning kontrakt toʻlovlari mazkur tartib asosida qoplab berilmaydi.
