NASA e'lon berdi: ko‘ngillilar 60 kun karavotda yotgani uchun 19 ming dollar oladi

NASA va Yevropa kosmik agentligi tajriba uchun ko‘ngilli shaxslarni yig‘moqda, unda 60 kun davomida karavotdan turmaslik talab etiladi. Bu haqda RIA «Novosti» xabar berdi.

Eksperiment ishtirokchilari 19 ming dollardan olishadi.

Agentlikka tajribada qatnashish istagini bildirgan shaxslardan 1300ta murojaat kelib tushdi.

Tajriba 15 kunlik tayyorgarlik, 60 kun karavotda yotishdan iborat bo‘lib, uning davomida 100dan ortiq olimlar inson organizmiga vaznsizlikning ta'sirini aniqlash maqsadida turli tadqiqotlar o‘tkazadi. Shuningdek, tajriba 14 kunlik reabilitatsiyani ham o‘z ichiga oladi.

24 nafar ishtirokchidan biri bo‘lish uchun anketa to‘ldirish, suhbatlashish va tajribada qatnashuvchilar safiga qo‘shilishga tayyorlikni baholovchi psixologik testni o‘z ichiga oluvchi murakkab tanlovdan o‘tish kerak. 

Germaniya aerokosmik markazi aerokosmik tibbiyot instituti rasmiy vakili Friderike Vyutsherning aytishicha, bularning barchasi ishtirokchi loyihadan erta chiqib ketish xavfini kamaytirish uchun amalga oshiriladi.