Amazon asoschisi kompaniya kelgusida ko‘p milliardlik yo‘qotishlarga to‘qnash kelishidan ogohlantirdi

Amazon asoschisi va dunyoning eng boy odami Jyeff Bezos kompaniya aksiyadorlarini kelgusida kompaniya yirik ko‘ngilsizliklarga muqarrar to‘qnash kelishi va ular milliardlab dollarlarga tushishidan ogohlantirdi. U bu haqda o‘zining aksiyadorlarga yo‘llagan har yillik maktubida ma'lum qilgan.   

“O‘sish sari hammasi masshtablanishi lozim, jumladan sizning muvaffaqiyatsiz tajribalaringiz o‘lchami ham. Agar muvaffaqiyatsizliklar ko‘paymasa, unda siz barchasini harakatlantira oluvchi ko‘lamda biror yangi narsa yarata olmaysiz”, deb yozgan Bezos maktubida.   

U Amazon uning darajasidagi kompaniyalarga xos bo‘lgan ko‘lamda tajribalar o‘tkazmoqchiligini va bu o‘z ortidan milliardlik yo‘qotishlarga olib kelishi mumkinligini ta'kidlab o‘tgan.  

“Biz yaxshi loyihalarni amalga oshirishga astoydil harakat qilamiz, biroq ularning barchasi ham o‘zini qoplamaydi. Aksiyadorlarga aytadigan yaxshi yangiligim shuki, bitta yutuqli loyiha muvaffaqiyatsizlik keltirgan qolgan loyihalarning xarajatlarini bir necha marta qoplab yuborishi mumkin”, deb o‘z so‘zlarini yakunlagan Bezos.    

Milliarder kompaniyaning deyarli bir vaqtda paydo bo‘lgan ikkita loyihasi – Fire smartfoni va Echo “aqlli” karnayini bunga misol tariqasida keltirgan. Uning aytishicha, smartfon muvaffaqiyatsizlikka uchragan va kompaniya 2015 yilda uning ishlab chiqarilishini to‘xtatgan. Smartfonni ishlab chiqish uchun esa 170 mln dollar sarflangan. 

“Biz bu loyihalar kelgusida muvaffaqiyatli bo‘lishi u yoqda tursin, yakunda qanday ko‘rinishda bo‘lishini ham ishonch bilan ayta olmaganmiz”, deb tan olgan Bezos va kompaniya orttirilgan tajribani muvaffaqiyatli mahsulotlar – Alexa ovozli yordamchisiga ega Echo karnayini rivojlantirishda qo‘llay olganini ta'kidlab o‘tgan. 

Kompaniyaning 2018 yil natijalariga ko‘ra sof daromadi 10,1 mlrd dollarni tashkil qildi. Oxirgi 3 yil ichida bu qiymat 3 martadan ziyodroqqa ko‘paygan. Yillik hisobda tushum 30 foizga oshib, 232,9 mlrd dollargacha yetgan.