09:06 / 12.04.2019
7653
АҚШда Falcon Heavy ракетасининг илк тижорий парвози амалга оширилди
Фото: REUTERS/Joe Skipper

Falcon Heavy ракетаси Саудия Арабистони учун Arabsat 6A сунъий йўлдоши билан илк тижорий рейсига жўнади. 

Ракета 12 апрель Тошкент вақти билан соат 03:35да Канаверал бурнидаги космодромдан учирилган. Парвоз стартидан 7 дақиқа кейин ракета биринчи поғонасининг иккита ён блоки старт жойи яқинидаги майдончага муваффақиятли қўнган.  

Яна 2 дақиқадан кейин Атлантикадаги баржага марказий блок қўнган. “Биз биринчи поғонанинг барча уч блокини илк бор қўндира олдик”, деб айтишган компания вакиллари.

Стартдан 9 дақиқа кейин ракета белгиланган орбитага эришган.

Arabsat 6A сунъий йўлдоши Яқин Шарқ, Африка ва Европа ҳудудларида телевизион ва телефон сигналлари узатиш ҳамда интернет учун мўлжалланган. 

Falcon Heavy ракетаси учун бу парвоз унинг 2-парвози бўлди. Унинг илк парвози 2018 йил февралида бўлиб ўтган. Ушбу ракета дунёда мавжуд барча ракеталардан энг кучлиси ҳисобланади. 

Top