Yaya Ture faoliyatiga yakun yasadi

Ivuarlik yarimhimoyachi Yaya Turening agenti Dmitriy Selyuk mijozi futbolchilik faoliyatiga nuqta qo‘yayotganini ma'lum qildi. Bu haqda Sport24.ru xabar bermoqda.

«Bu haqda birinchi bo‘lib gapiraman: Yaya chempionlik karerasiga yakun yasashga qaror qildi. Uning uchun «Manchester Siti» tashkil etgan xayrlashuv uchrashuvi haqiqatan ham uning nafaqat shu jamoadagi, balki umuman futbolchi sifatidagi faoliyatiga qo‘yilgan nuqta bo‘ldi», – dedi agent.

Selyukning so‘zlariga ko‘ra, Ture allaqachon murabbiylik litsenziyasiga ega va shu yil iyundan boshlab biror jamoada ikkinchi murabbiy sifatida ishlashi mumkin.

«Shunisi aniqki, u ish boshlaydigan klubda nafaqat ikkinchi murabbiy sifatida faoliyat yuritadi, balki sport direktori yoki prezidentning sport bo‘yicha maslahatchisi funksiyalarini ham bajaradi. Yayada Rossiya va Ukrainadan takliflar bor», – deya ma'lum qildi Dmitriy Selyuk.

35 yoshli yarimhimoyachi faoliyati davomida «Olimpiakos», «Monako», «Barselona» va «Manchester Siti» klublari sharafini himoya qildi. U 2018 yil sentabr oyida «Olimpiakos»ga qaytgan va dekabr oyida o‘zaro kelishuv asosida shartnomasini bekor qilgandi. Ture 2019 yil aprel oyida butsalarini mixga ilishni rejalashtirmayotgani haqida aytgan edi.

Yaya Ture Yunoniston (bir marta), Ispaniya (ikki karra) va Angliya (uch karra) chempioni sanaladi. Ushbu har uchala mamlakatda bir marotabadan kubok sohibi bo‘lgan. 2009 yilda «Barselona» safida Chempionlar ligasida g‘olib chiqqan va o‘sha yili klublar o‘rtasidagi jahon chempionatida oltin medalni qo‘lga kiritgan.

Kot-d`Ivuar milliy jamoasida 101ta o‘yinda 19ta gol urgan Ture 2015 yilda Afrika millatlar kubogida chempionlikka erishgan. Shuningdek, 2011-2014 yillarda ketma-ket to‘rt marotaba Afrikada yilning eng yaxshi futbolchisi bo‘lgan.