«Yuventus» o‘z maydonida mavsumdagi so‘nggi o‘yinni o‘tkazdi. Shu sababli, turinliklar bellashuvdan keyin chempionlikni muxlislar oldida nishonlashga qaror qilishdi.
Raqibning «Atalanta» ekani o‘yinga qo‘shimcha jozibani bag‘ishladi. «Yuventus» bu mavsumda bergamoliklar bilan safarda durang o‘ynagan, Italiya Kubogida esa yirik hisobda yutqazib, musobaqani tark etgandi. Shu sababli, turinliklar raqibdan o‘ch olishni ham maqsad qilishgandi. Ammo «Atalanta»ning rejasi boshqacha edi. Jamoa o‘z tarixida ilk marotaba Chempionlar Ligasiga chiqishga yaqin turibdi, bu esa futbolchilarga qo‘shimcha kuch va ishtiyoq berdi.
Birinchi bo‘limda «Atalanta» ustunligi sezilib turdi. Ular xavfli vaziyatlarni raqibga nisbatan ko‘proq yaratishdi. 33-daqiqada esa hisob ochildi. Burchak zarbasi amalga oshirilganidan so‘ng, Ilichich jarima maydoni ichida himoyachilardan chaqqonroq harakat qilib, Shchensni darvozasini ishg‘ol qildi.
Ikkinchi bo‘limda Allegri himoyachilarni zaxiraga olib, Bernardeski, Manjukich va Kenni maydonga tushirdi. Natijada, «Yuventus» bosimni oshirib, hisobni tenglashtirishga muvaffaq bo‘ldi. 80-daqiqada Kuadradoning jarima maydoniga yetkazgan to‘pini Manjukich yaqin masofa va o‘tkir burchak ostidan darvozaga yo‘lladi.
1:1 hisobida yakunlangan o‘yindan keyin «Yuventus» chempionlik unvonini tantanali nishonlash marosimini o‘tkazdi. «Atalanta» ham durangni «tantana qildi» desak ham bo‘ladi. Bu natijadan so‘ng bergamoliklar 66 ochko bilan musobaqa jadvalida 3-o‘rinni egallab turishibdi va o‘z taqdirini o‘zi hal qilish imkoniyatini saqlab qolishdi.
«Napoli» o‘zi uchun hech narsani hal qilmaydigan o‘yinda Chempionlar Ligasiga intilayotgan va ishtiyoqi baland bo‘lgan «Inter» bilan bellashdi. Biroq, neapolliklarning raqibga ochko berish niyati yo‘q edi. «Napoli» har tomonlama «Inter»dan ustunlik qildi va himoyachilarning xatolarini gollar bilan jazolab, 4:1 hisobidagi yirik g‘alabani qo‘lga kiritdi.
16-daqiqada Zelinski uzoq masofadan kuchli va aniq zarba yo‘llab, chiroyli gol urdi. 61-daqiqada Mertens jarima maydoniga yetkazilgan to‘pni boshi bilan darvozaga kiritdi. 71 va 78-daqiqalarda Ruis himoyachilar xatosidan foydalanib, hisobni yirik ko‘rinishga keltirdi. O‘yin oxirida Ikardi penaltidan gol urib, farqni biroz qisqartirdi.
Bu natijadan so‘ng, «Napoli» 79 ochko bilan 2-o‘rinda, «Inter» esa 66 ochko bilan 4-o‘rinda bormoqda. «Neradzurri» Chempionlar Ligasi yo‘llanmasini beruvchi bu o‘rinni saqlab qolish uchun so‘nggi turda o‘z maydonida «Empoli»ni mag‘lub etishi kifoya.
YeVROKUBOKLARDA IShTIROK ETUVChI JAMOALARNING BARChASI MA'LUM BO‘LDI
So‘nggi tur oldidan Italiya sharafini yevrokuboklarda himoya qiladigan jamoalar nomi ma'lum bo‘ldi.
«Torino» safarda «Empoli» bilan o‘ynadi va kutilmaganda yirik hisobda yutqazdi. Ligada qolish uchun kurashayotgan mezbonlar juda katta ishtiyoq bilan o‘ynab, raqibni 4:1 hisobida mag‘lub etishdi. Natijada, «Torino» kelasi mavsumda yevrokubokda o‘ynash imkoniyatini boy berdi.
«Roma» safarda «Sassuolo» bilan 0:0 hisobini qayd qildi. «Milan» o‘z maydonida autsayder «Frozinone»ni 2:0 hisobida yengdi. Bu natijalardan so‘ng, «Roma» va «Milan»ning kelasi mavsumda kamida Yevropa Ligasida to‘p tepishi oydinlashdi. Ammo jamoalar Chempionlar Ligasi yo‘llanmasini qo‘lga kiritish imkoniyatini ham saqlab turishibdi. Avvalroq, «Latsio» Italiya Kubogida g‘alaba qozonib, Yevropa Ligasiga chiqqan edi.
5TA KLUB LIGADA JON SAQLAB QOLISh UChUN KURAShADI
A Seriyadagi o‘rnini saqlab qolish uchun kurash ham qizg‘in kechmoqda. Avvalroq ligani «Kevo» va «Frozinone» klublari tark etgan edi. Ayni paytda «Bolonya», «Fiorentina», «Udineze», «Empoli» va «Jyenoa» klublari V Seriyaga ravona bo‘lish xavfi ostida turishibdi.
Hozirda 17-o‘rinni 37 ochko bilan «Jyenoa» egallab turibdi. Bu turda genuyaliklar o‘z maydonida «Kalyari» bilan 1:1 hisobini qayd etishdi. So‘nggi turda esa safarda «Fiorentina» mehmoni bo‘lishadi. Florensiyaliklarning ham ahvoli yaxshi emas, jamoa fevral oyidan beri g‘alaba nimaligini bilmayapti. Demak ligani tark etadigan jamoa nomi aynan shu o‘yinda aniqlansa ajab emas.
26 may
Atalanta - Sassuolo
Bolonya - Napoli
Inter - Empoli
Kalyari - Udineze
Roma - Parma
Sampdoriya - Yuventus
SPAL - Milan
Torino - Latsio
Fiorentina - Jyenoa
Frozinone - Kevo
MASSIMILIANO ALLeGRI «YuVeNTUS»NI TARK ETADI
«Yuventus» bosh murabbiyi Massimiliano Allegri mavsum yakunlanganidan so‘ng, lavozimini tark etadi.
Football Italia xabariga ko‘ra, 51 yoshli mutaxassis klub rahbariyati bilan muzokara o‘tkazganidan so‘ng, shunday qarorga kelgan.
Allegri «Yuventus»ni 2014 yildan beri boshqarmoqda. Uning shartnomasi 2020 yil yoziga qadar mo‘ljallangan edi. Uning qo‘l ostida turinliklar 5 marta Italiya chempioni bo‘lishdi va 4 marta mamlakat Kubogini qo‘lga kiritishdi. Shuningdek, 2 marta Chempionlar Ligasi finalida to‘p tepishdi.
Allegri faoliyatini «Bavariya», «PSJ», «Manchester Yunayted», «Tottenhem» yoki «Galatasaroy» klublaridan birida davom ettirishi mumkin.
RONALDU A SeRIYaNING ENG YaXShI FUTBOLChISI DeB TOPILDI
«Yuventus» hujumchisi Krishtianu Ronaldu Italiya chempionatining bu mavsumdagi eng yaxshi futbolchisi deb topildi, deb xabar beradi Football Italia.
Shuningdek, u bilan birga darvozabon Samir Handanovich («Inter»), himoyachi Kalidu Kulibali («Napoli»), yarimhimoyachi Sergey Milinkovich-Savich («Latsio»), yarimhimoyachi Nikolo Dzanolo («Roma») va hujumchi Fabio Kualyarella ham mavsumning eng yaxshilari qatoriga kiritildi.
Ronaldu 2018 yil yozida «Yuventus»ga o‘tgan edi. Bu mavsumda futbolchi A Seriyada 31ta o‘yinda maydonga tushib, 21ta gol urgan va 11ta golga hammualliflik qilgan.
