Samarqand, Buxoro va Xivadagi turistik obektlarda Internetdan simsiz foydalanish bo‘yicha ommaviy nuqtalar tashkil etiladi

O‘zbekiston Respublikasi Prezidentining «O‘zbekiston Respublikasi aholi punktlarida telekommunikatsiya infratuzilmasini jadal rivojlantirish chora-tadbirlari to‘g‘risida»gi qarori qabul qilindi.

Qarorda bir qator vazirlik va idoralarga yangi vazifalar yuklatilmoqda. 

O‘zbekiston Respublikasi Transport vazirligi:

• telekommunikatsiya operatorlari va provayderlariga telekommunikatsiya obektlarini o‘rnatishga har taraflama ko‘mak bersin, shuningdek, zaruratga ko‘ra, ularning temir yo‘llar bo‘yidagi elektr tarmoqlariga ulanishini ta'minlaydi;
• yo‘l-transport infratuzilmasini qurish va kapital ta'mirlashda bir vaqtda temir yo‘llari bo‘ylab, shuningdek, zaruratga ko‘ra, avtomobil yo‘llari bo‘ylab kelgusida telekommunikatsiya operatorlari va provayderlariga ijaraga berish uchun telekommunikatsiya kanalizatsiyasini qurishni ko‘zda tutadi.

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi:

• Moliya vazirligi huzuridagi Davlat-xususiy sheriklikni rivojlantirish agentligi bilan birgalikda ikki oy muddatda telekommunikatsiya infratuzilmasini yaratish hamda olis va qishloq aholi punktlaridagi budjet tashkilotlarga, shuningdek, aholi va xo‘jalik yurituvchi sub'yektlarga xizmat ko‘rsatish bo‘yicha loyihalarni davlat-xususiy sheriklik shartlari asosida amalga oshirish tartibini ishlab chiqadi va tasdiqlaydi;
• ikki oy muddatda Qoraqalpog‘iston Respublikasi va har bir viloyat markazlarida tadbirkorlik sub'yektlari, shu jumladan, telekommunikatsiya operatorlari va provayderlarining server hamda telekommunikatsiya qurilmalarini zamonaviy maydonchalarda joylashtirish bo‘yicha xizmatlar majmuasini taqdim etuvchi xosting va trafik almashuvi markazlarini tashkil etish bo‘yicha “Yo‘l xaritasi”ni ishlab chiqadi va tasdiqlaydi;
• har chorakda O‘zbekiston Respublikasi Ochiq ma'lumotlar portalida keng polosali ulanish va mobil Internet qamrovi zonalari to‘g‘risida hududlar kesimidagi ma'lumotlarni e'lon qilib etib boradi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

• telekommunikatsiya operatorlari va provayderlarining murojaatlari asosida olis va qishloq aholi punktlarida, turistik va rekreatsion zonalarda, magistral avtomobil va temir yo‘llari bo‘ylarida doimiy foydalanish (yoki uzoq muddatli ijara) huquqida telekommunikatsiya tarmoqlarini, shu jumladan, optik-tolali aloqa liniyalarini, antenna minora va machtalarini hamda telekommunikatsiya obektlarini o‘rnatish xonalarini qurish uchun yer uchastkalarining o‘z vaqtida ajratilishini ta'minlaydi.

O‘zbekiston Respublikasi Sog‘liqni saqlash vazirligi Axborot texnologiyalari va kommunikatsiyalarini rivojlantirish vazirligi bilan birgalikda:

• uch oy muddatda ilg‘or xalqaro tajribadan kelib chiqqan holda mobil aloqa va simsiz ulanish qurilmalaridan turli chastotalardagi elektromagnit nurlanishi ta'siri xavfsizligining sanitariya qoidalari va me'yorlarini qayta ko‘rib chiqadi.

O‘zbekiston Respublikasi Energetika vazirligi “O‘zbekenergo” AJ bilan birgalikda olis va qishloq aholi punktlarida, turistik va rekreatsion zonalarda, magistral avtomobil va temir yo‘llar bo‘ylarida quyidagilarni o‘z vaqtida ta'minlab boradi:

• telekommunikatsiya operatorlari va provayderlari murojaatlari bo‘yicha telekommunikatsiya obektlarini elektr tarmoqlariga ulash;
• viloyatlar va tumanlar markazlaridagi mobil aloqa tarmoqlari bazaviy stansiyalarini hamda telekommunikatsiya operatorlari va provayderlarining markaziy bog‘lamalarini, teleradioeshittirish obektlarini elektr tarmoqlaridan o‘chirilmaydigan toifali obektlar qatoriga kiritish;
• elektr tarmoqlari tayanch ustunlariga telekommunikatsiya tarmoqlarini beg‘araz asosda o‘rnatishga (osishga) ruxsat berish.

Shuningdek, Prezident qarorida 2022 yil 1 yanvarga qadar yuridik shaxslar tomonidan olib kiriladigan telekommunikatsiya vositalari bojxona to‘lovlarini to‘lashdan (QQS va bojxona rasmiylashtiruvi uchun yig‘imlardan tashqari) ozod etiladi.

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi, Turizmni rivojlantirish davlat qo‘mitasi, Madaniyat vazirligi manfaatdor vazirlik va idoralar bilan birgalikda: 

• Samarqand, Buxoro va Xiva shaharlaridagi turistik obektlarda bosqichma-bosqich, shu jumladan, 2019 yilda davlat-xususiy sheriklik shartlarida Internet tarmog‘idan simsiz foydalanish bo‘yicha ommaviy nuqtalarni tashkil etsin.

O‘zbekiston Respublikasi Iqtisodiyot va sanoat vazirligi: 

• telekommunikatsiya infratuzilmasini rivojlantirish uchun tovarlar (ishlar, xizmatlar)ni xarid qilishga texnik topshiriqlarni kompleks ekspertizadan o‘tkazish va tegishli xulosa berishni ular kiritilgan sanasidan boshlab ikki hafta muddatda ta'minlaydi.

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi manfaatdor vazirlik va idoralar bilan birgalikda uch oy muddatda O‘zbekiston Respublikasi Vazirlar Mahkamasiga:

• ilg‘or xalqaro tajribani inobatga olgan holda telekommunikatsiya obektlarini olib kirish, loyihalash, qurish va foydalanishga qabul qilishda ruxsat berish tartib-taomillarini tubdan takomillashtirish va qisqartirish;
• qonun hujjatlariga mazkur qarordan kelib chiqadigan o‘zgartirish va qo‘shimchalar to‘g‘risida takliflar kiritadi.