Prezident Shavkat Mirziyoyev 27-sentabr – Butunjahon turizm kuni munosabati bilan Oʻzbekiston turizm sohasi xodimlariga tabrik yoʻlladi.
Tabrikda qayd etilishicha, bugungi kunda turizm Oʻzbekiston iqtisodiyotida muhim oʻrin tutadigan, minglab yangi ish oʻrinlari yaratish va aholi farovonligini oshirishga xizmat qiladigan istiqbolli tarmoqqa aylanib bormoqda.
Maʼlum qilinishicha, 2025-yilda Oʻzbekistonga kelgan xorijiy sayyohlar soni 2016-yilga nisbatan salkam 6 barobar oshib, qariyb 12 million nafarga yetgan, turizm xizmatlari eksporti 11 karra koʻpayib, 4 milliard 800 million AQSH dollarini tashkil etgan.
“Mamlakatimizning global turizm siyosatidagi oʻrni tobora mustahkamlanib bormoqda. Bu haqda soʻz yuritganda, Oʻzbekistonning tashabbusi bilan BMT Bosh Assambleyasi tomonidan 2027-yil Xalqaro barqaror va yashovchan turizm yili, deb eʼlon qilingani, BMT Turizm tashkiloti respublikamizni dunyodagi eng tez oʻsayotgan beshta sayyohlik yoʻnalishiga kiritganini taʼkidlash lozim.
Albatta, bunday yutuqlar zamirida yurtimizdagi minglab turoperator va turagentlar, mehmonxona va oilaviy mehmon uylari xodimlari, gid va ekskursovodlar, restoratorlar, transport va servis kompaniyalari vakillari, hunarmandlar, madaniyat namoyandalari, muzey xodimlari, ustoz-murabbiylarning mashaqqatli mehnati mujassamdir.
Fursatdan foydalanib, ushbu yoʻnalishlarda sidqidildan xizmat qilayotgan barcha soha xodimlariga samimiy minnatdorlik bildiraman”, deyiladi tabrikda.
Prezident tabrigida aytilishicha, Xivada oʻzida tarix va zamonaviylikni uygʻunlashtirgan xalqaro turistik shaharcha, kongress markazi va tarixiy-etnografik bogʻ barpo etish, Ichanqalʼani raqamli texnologiyalar asosida “aqlli” muzey-majmuaga aylantirish rejalashtirilggan.
Samarqandda noyob eksponatlar jamlangan Ipak yoʻli muzeyi tashkil etiladi. Qoraqalpogʻistonda arxeologik yodgorliklar boʻylab yangi turistik yoʻnalishlar ochiladi. Qashqadaryo viloyatining Shahrisabz tumanida “Gʻilon”, Namangan viloyatining Pop tumanida “Arashan” kabi yangi majmualar tashkil etiladi.
Sohada zamonaviy texnologiyalarni keng joriy etish, yagona milliy turizm platformasini ishga tushirish, sayyohlik xizmatlarini bitta tizimga integratsiya qilish, sunʼiy intellekt imkoniyatlaridan keng foydalanish, kadrlar malakasini muntazam oshirib borish ham ustuvor vazifa boʻlib qoladi. Gastronomik, ekologik, ziyorat, tibbiyot, togʻ va sarguzasht, ishbilarmonlik, etno va qishloq turizmi kabi yuqori qoʻshilgan qiymat yaratadigan yoʻnalishlarni jadal rivojlantirishga alohida ahamiyat beriladi.
