Fransiya chempionatining 81-mavsumi nihoyasiga yetdi. 24 may oqshomida so‘nggi turning barcha uchrashuvlari bir vaqtda bo‘lib o‘tdi.
Sovrindorlarning barchasi muddatidan oldin ma'lum bo‘lib ulgurgan edi. Oltin va kumush medallari egasi – «PSJ» va «Lill» mavsumni mos ravishda «Reyms» va «Renn» jamoalari maydonida 1:3 hisobidagi mag‘lubiyat bilan yakunladi. Bronza medali sohibi «Lion» esa 91-daqiqada urilgan gol evaziga safarda «Nim»ni taslim etdi.
Shu tariqa, «PSJ» ketma-ket sakkizinchi marotaba Fransiya chempioni bo‘ldi hamda bu borada «Nant» va «Monako» klublariga yetib oldi. Ulardan oldindagi «Marsel» birinchi divizionda 9 marta, «Sent-Eten» esa 10-marta g‘alaba qozongan.
Qayd etish kerak, parijliklar Fransiya chempionatining barcha 38ta turida gol urishni uddalagan tarixdagi ilk klubga aylandi.
«PSJ» hujumchisi Kilian Mbappe 29 o‘yinda urgan 33ta goli bilan chempionat to‘purariga aylandi. Avvalroq u Fransiya professional futbolchilar kasaba uyushmasi tomonidan mavsumning eng yaxshi futbolchisi va mavsumning eng yaxshi yosh futbolchisi deya e'tirof etilgandi.
Chempionlar ligasi guruh bosqichining to‘g‘ridan to‘g‘ri yo‘llanmalari «PSJ» va «Lill»ga nasib qildi. Uchinchi o‘rindagi «Lion» YeChL saralashida qatnashadi. To‘rtinchi pog‘onadagi «Sent-Eten» va Fransiya kubogi sohibi «Renn» Yevropa ligasi guruh bosqichida ishtirok etadi. Liga kubogi g‘olibi «Strasburg» esa YeL ikkinchi saralash bosqichiga yo‘llanma oldi.
Turnirni 19-20-o‘rinlarda yakunlagan «Kan» va «Gengam» jamoalari keyingi mavsum ikkinchi divizionda kurash olib boradi. «Dijon» esa o‘tish o‘yinlarida qatnashadi.
Fransiya chempionati
38-tur, 24 may
Reyms – PSJ 3:1 (1:0, 2:1)
Gollar: 1:0 – 36 Baba, 2:0 – 56 Kafaro, 2:1 – 59 Mbappe, 3:1 – 90+4 Chavarriya.
PSJ – Buffon, Mene, Markinos, Kerer, Kurzava (Shupo-Moting, 90), Paredes (Bernat, 79), Verratti, Di Mariya, Draksler (Dani Alves, 66), Mbappe, Kavani.
Ogohlantirishlar: Dingome (15), Draksler (44), Mendi (80).
