«PSJ» «Barsa»ga ham 4 ta gol urdi, «Siti» Holandsiz yirik gʻalabaga erishdi
|12:225 05215 min
Seshanba oqshomida YeChLning 3-turi doirasida oʻtkazilgan oʻyinlar, gollar va turnir jadvalidagi vaziyat.
Parijliklar kuzning eng muhim oʻyinida gʻalabaga erishdi, ammo jiddiy yoʻqotishlarga uchradi; Abduqodir Husanov toʻliq oʻynagan, Holand zaxiradan ham tushmagan oʻyinda «Siti» 5 ta gol urib gʻalaba qozondi; «Liverpul» esa 7 gol urilgan oʻyinda kambek amalga oshirdi; Rahmonaliyev va jamoasi «Borussiya»ga yutqazdi.
Bu oʻyindan muxlislar koʻp narsa kutishayotgandi va jamoalar amalda ham tomoshabop oʻyin namoyish etib berishdi. Xvicha Kvaratsxeliya birinchi daqiqadayoq darvoza ustunini poyladi. Boʻlim davomida kataloniyaliklar posboni Joan Garsiya jami sakkiz seyv ijro etishiga toʻgʻri keldi. Parijliklar oʻyin yakunigacha darvoza sohasiga toʻgʻri borgan zarbalari sonini 14 taga yetkazishdi.
Ammo birinchi boʻlimda gollardan koʻra jarohatlar koʻp boʻldi. Avvaliga Usmon Dembele, uning ortidan Dani Olmo jarohat olib maydonni tark etdi.
Ularning oʻrniga zaxiradan tushgan Ferran Torres va Fermin Lopes esa vaziyatlarni koʻkka sovurishdi. Faqat boʻlim oxirlarida Dezire Due oʻz mahoratini namoyish etib, himoyachilar qurshovida turgan holda qaytarib boʻlmas zarba yoʻllab, hisobni ochdi.
Four special strikes, which was the best? ⚽ @Heineken | #UCLGOTD https://t.co/0GDg8AG7lv
Ikkinchi boʻlim boshida esa kataloniyaliklarning 19 yoshli himoyachisi Havi Espart oʻng qanotdan oldinga yurdi va hisobni tenglashtirdi. Oʻtkazilgan gol ortidan mezbonlar ketma-ket yoqimsiz holatlarga duch kelishdi. Markinios va Xvicha jarohat olib maydonni tark etishdi. Gurjistonlik vingerning jarohati jiddiy ekani va u mavsum oxirlariga qadar safga qayta olmasligi aytilmoqda.
Mavzuga oid
Keyin esa jamoalar yetti daqiqa ichida bittadan gol urishdi: Due burchakdan oshirgan toʻpni Ernandes bosh bilan darvoza toʻriga yoʻlladi, keyin esa Yamal endigina maydonga tushgan Zair-Emerining xatosidan foydalanib, hisobni yana bir bor tenglashtirdi.
Oʻyin durang natijaga qarab ketayotgandi, ammo parijliklar asosiy yetakchilaridan ayrilganiga qaramay, nomdor raqibga qarshi oʻyinni gʻalabaga aylantira olishdi: soʻnggi oʻn daqiqalikda Vitinya va Ruis bittadan gol urib, kataloniyaliklarning gʻalabali seriyasiga nuqta qoʻyishdi. «Barselona» bu oʻyingacha yutqazish tugul, durang ham oʻynamagan, 11 oʻyinda 48 gol urib, yoʻlidan chiqqan raqibga dahshat solayotgandi (la liganing toʻqqiz oʻyinida 39 gol, Chempionlar ligasining dastlabki ikki oʻyinida yana toʻqqizta). Ammo «PSJ» YeChLda ikki mavsumdan buyon gʻolib boʻlayotgani bejiz emasligini isbotladi. Ketma-ket «Siti» va «Barsa»ga qarshi oʻyinlarda 4 tadan gol urgan Luis Enrike shogirdlari asosiy yevrokubokda 13 oʻyindan iborat magʻlubiyatsiz seriya (9 gʻalaba, 4 durang) qayd etmoqda.
Keyingi turda «PSJ» «Vilyarreal» mehmoni boʻladi, «Barselona» «Aston Villa»ni qabul qiladi.
APLning oxirgi oʻyinida maydonni oqsoqlanib tark etgan Holand zaxirada qoldirildi, Enso Mareska uning oʻrniga 17 yoshli Sambani maydonga tushirdi. Shuningdek, soʻnggi vaqtlarda zaxirada qolib ketayotgan oʻzbekistonlik himoyachi Abduqodir Husanov ham bu safar boshlangʻich tarkibga kiritildi.
AEK nomdor raqibga qarshi 12 daqiqa chidab berdi. Keyin esa standart vaziyatda hisob ochildi. Enso Fernandes toʻpni jonli devor ustidan oʻtkazdi, ammo darvoza toʻsinini poyladi, qaytgan toʻpga esa birinchi boʻlib Elliot Anderson yetib keldi va boʻsh darvozani ishgʻol etdi. Bu ushbu yarimhimoyachi uchun «shaharliklar» safidagi ilk gol boʻldi. Tanaffus arafasida esa Foden Lyuis bilan devor uslubida oʻynab, yakuniy zarbani aniq yoʻlladi va hisobdagi farqni oshirdi.
Ikkinchi boʻlim boshida «Siti» kutilmaganda gol oʻtkazib yubordi. Tanaffusda oʻyinga qoʻshilgan Zini himoyachi Piliosga golli assist berdi. Ammo bu gol bilan greklar raqibning jahlini chiqarib yubordi. Avvaliga Foden Sherkining goliga uzatma berdi – fransuz yarimhimoyachisi oʻz uslubida himoyachini dogʻda qoldirdi va toʻpni burchakka aniq yoʻlladi. Keyin esa Foden het-trikni rasmiylashtirdi (3+1) va «shaharliklar»ning YeChLning bir oʻyinida uch gol urgan oltinchi futbolchisiga aylandi. Jamoaning eng koʻp het-trik qayd etgan futbolchisi Holand esa oʻyin oxirigacha zaxirada qoldi va muhimroq oʻyinlar uchun kuch saqladi.
Keyingi turda «Manchester Siti» safarda «Leypsig» bilan oʻynaydi, AYeKni «Real»ga qarshi uy oʻyini kutmoqda.
Isak, Virs va Barkolya kabi hujum vakillari zaxirada qoldirilgan oʻyinda «Liverpul» YECHL tarixidagi eng tezkor golini oʻtkazib yubordi (3 daqiqayu 54 soni). Jamoa sardori Virjiyl van Deyk bosh bilan toʻpni darvozabonga qaytarishga urinib, Jorj Mikautadzega gol sovgʻa qildi.
Birinchi boʻlim oʻrtalaridan oʻtganda esa mezbonlar himoyasi yana bir bor muvaffaqiyatsizlikka uchradi va «Vilyarreal»ning birdaniga ikki futbolchisi Alison qarshisida paydo boʻldi: Saliba Kardonani golli uzatma bilan taʼminladi. Ammo tablodagi 0:2 hisobi qizillarni sindira olmadi. Avvaliga Makallister burchak zarbasidan keyin bosh bilan zarba yoʻllab, hisobdagi farqni qisqartirdi. Tanaffus arafasida esa Kardona qoʻpol xatoga yoʻl qoʻydi va Arauho Ngumoaning uzatmasini golga aylantirib, hisobni tenglashtirdi – 2:2.
Ikkinchi boʻlimda esa «Liverpul»ni toʻxtatib boʻlmadi va uch daqiqa ichida oʻyin taqdiri hal boʻldi. Hal qiluvchi hujumda Makallister toʻpni oʻng qanotga oshirdi va oʻzi jarima maydoni tomon yugurib, qaytarib berilgan toʻpni rikoshet yordamida darvoza toʻriga yoʻlladi. Keyin esa Simikas maydon markazida toʻpni olib qoʻydi va tezkor qarshi hujum boshlab berdi, bu hujum Gakponing zaxiradan maydonga tushgan Virsga golli pas berishi bilan yakunlandi. «Vilyarreal» safida zaxiradan tushgan Oluvaseyining goli esa mersisaydliklarning YeChLdagi gʻalabali seriyasini yoʻqqa chiqara olmadi. Andoni Iraola jamoasi uch turda 9 ochko toʻplagan holda «PSJ» bilan birgalikda turnir jadvalini boshqarmoqda.
Keyingi turda «Liverpul» «Fenerbahche» mehmoni boʻladi, «Vilyarreal» uyda «PSJ»ni qabul qiladi.
Dastlabki ikki turda ilojsiz holatda yutqazgan neapolitanliklar bu safar norveglar bilan birga gollar shousini uyushtirishdi.
Matteo Politano ilk daqiqadayoq hisobni ochdi, boʻlim davomida mehmonlar javob golini urishdi, ammo Skott Maktominey baribir jamoasini tanaffusga gʻolib holda olib chiqdi.
Ikkinchi boʻlimda «Budyo» yana muvozanatni tikladi. Maktominay yana neapolitanliklarni olgʻa boshlashiga toʻgʻri keldi: 75-daqiqada u havodagi kurashda raqibdan ustun keldi va bosh bilan toʻpni darvoza toʻriga joyladi. 88-daqiqada Odin Bortfutning avtogoli oʻyin taqdirini hal qildi. Norveglarning 90+4-daqiqadagi navbatdagi javob goli oʻyin taqdirini oʻzgartira olmadi.
Keyingi turda «Napoli» safarda «Portu» bilan oʻynaydi, «Budyo»ni «Lill»ga qarshi uy uchrashuvi kutmoqda.
Turnirni «Viking» va «Slovan» kabi raqiblar ustidan qozonilgan gʻalabalar bilan boshlagan va peshqadamlar qatorida borayotgan «Shtutgart» bu turda jiddiy raqibga qarshi oʻynashiga toʻgʻri keldi. Oʻz maydonida oʻynagan nemislar gʻalabali seriyasini davom ettirishi ham mumkin edi – Oblak birinchi boʻlim davomida bir necha bor qutqarishiga toʻgʻri keldi, ammo Levelingning zarbasi qarshisida ojiz qoldi.
Tanaffusda Diyego Simeone Devid oʻrniga Lukmanni maydonga tashladi va ushbu oʻzgarish oʻzini oqladi. Ikkinchi boʻlim boshida nigeriyalik vinger chap qanotdan toʻpni jarima maydoniga uzatdi, Hulian Alvares esa bir teginishda toʻpni darvoza toʻsini ostidan toʻrga joyladi.
64-daqiqada esa madridliklar ozchilik boʻlib qolishdi: Morten Yulmand maydon markazida Anjelo Shtillerga qoʻpollik qildi va hakam tomonidan qizil kartochka bila jazolandi.
Qolgan daqiqalarda hisob oʻzgarmay qoldi.
Uch turdan keyin atigi toʻrt ochkoga ega boʻlgan madridliklar keyingi turda uyda «Bavariya» bilan oʻynaydi, bundesligadan koʻra YeChLda yaxshiroq qatnashayotgan «Shtutgart»ni «Galatasaroy» stadionidagi yana bir qiyin oʻyin kutmoqda.
Portugaliyadagi oʻyinda barchasini Gus Til ikkinchi boʻlimda urgan yagona gol hal qildi. Bu vaziyatda Sven Meynans darvoza tomon zarba bergandi, ammo toʻp qiyshiq ketayotganida hujumchi unga oyoq qoʻyishga ulgurdi. «Portu»da hisobni tenglashtirish uchun vaziyatlar boʻldi, ammo mehmonlar darvozabon Matey Kovarj va himoyachilarning jonbozligi evaziga gʻalabani saqlab qolishdi. Vaziyatlardan birida Lyutsxarel Gertreyda toʻpni darvoza chizigʻi ustida toʻxtatib qoldi.
Keyingi turda «Portu» «Napoli»ni, PSV – «Bryugge»ni qabul qiladi.
«Saboh» «Borussiya» Dortmundga qarshi munosib qarshilik koʻrsatdi. Bokuliklar birinchi boʻlimda durang hisob qayd etishgandi, ammo ikkinchi boʻlimda Seru Girassi dublni rasmiylashtirdi va oʻyin taqdirini hal qildi. Mezbonlar safida oʻzbekistonlik yarimhimoyachi Umarali Rahmonaliyev 81 daqiqa oʻynadi.
Keyingi turda «Borussiya» uyda «Betis» bilan oʻynaydi, «Saboh»ni Norvegiyada «Viking»ga qarshi safar oʻyini kutmoqda.
«Roma» «Slovan»ga qarshi oʻyinda hech qanday qarshilikka uchramadi – 4:0. Slovaklar – qatorasiga uch turda magʻlub boʻlgan holda (toʻplar nisbati 1:13) liganing asosiy autsayderi boʻlib turibdi.
Rimliklar ikki boʻlimda ikkitadan gol urishdi: avvaliga himoyachi Mario Ermoso standart vaziyatda hisobni ochdi. Keyingi uchta gol jamoa markaziy hujumchisi Doniell Malenning faolligi bilan urildi. Avvaliga uning zarbasi darvozabondan qaytganida toʻpga Nauel Molina birinchi boʻlib yetib keldi. Ikkinchi boʻlmi boshida uning uzatmasini Nikkolo Pizilli golga aylantirib, hisobni yirik koʻrinishga keltirdi. Biroz oʻtib Malenning oʻzi penaltidan foydalanib, yakuniy hisobni oʻrnatdi – 4:0.
Keyingi turda «Roma» «Old Trafford»da mehmon boʻladi, «Slovan»ni LASK maydoniga safar kutmoqda.
Oʻtgan turda «Aston Villa» maydonida javobsiz 6 ta gol qabul qilib olgan «Fanerbahche» ilk daqiqalardan oldinga tashlandi. Avvaliga Oʻgʻuz Oydin tezkor gol bilan hisobni ochdi, bir necha daqiqa oʻtib Grinvud hisobdagi farqni oshirdi. Koʻpchilik turklar bu oʻyinda yirik hisobda gʻalaba qozonib, toʻplar nisbatini yaxshilab olishiga tayyorlana boshlagandi, ammo chexlar sochilib ketmadi va darhol javob golini urishdi. Matteo Genduzining jarima maydoni yaqinidagi qoʻpol xatosi mehmonlarga oʻyinga qaytish imkonini berdi.
Tanaffusdan keyin «kanareykalar»da oʻyinni hal qilish uchun yetarlicha imkoniyatlar boʻldi, ammo vaziyatlardan foydalana olmadi. Oʻyin oxirida esa pragaliklar hisobni tenglashtirishdi. Umuman, durang hisob oʻyinga mos natija boʻldi: zarbalar boʻyicha hisob 14:15, darvoza sohasiga toʻgʻri borgan zarbalar soni 5:4 koʻrinishida edi.
Keyingi turda «Fener» va «Slaviya» APL top-klublari sinovidan oʻtadi – mos ravishda «Liverpul» va «Arsenal»ni qabul qilishadi.
