Buxoro viloyatida qurilish materiallari klasterlari tashkil etiladi

Normativ-huquqiy hujjatlar loyihalari muhokamasi portalida Vazirlar Mahkamasining “Buxoro viloyati Peshku tumanida qurilish materiallari klasterlarini tashkil etish chora-tadbirlari to‘g‘risida”gi qarori loyihasi joylashtirildi.

Hujjat bilan O‘zbekiston Respublikasi Iqtisodiyot va sanoat vazirligi, Investitsiyalar va tashqi savdo vazirligi, Davlat geologiya va mineral resurslari qo‘mitasi, “O‘zsanoatqurilishmateriallari” uyushmasi va Buxoro viloyati hokimligining Buxoro viloyati Peshku tumanining Jongeldi massivida qurilish materiallari ishlab chiqarish klasterlari - sanoat zonasini tashkil etish to‘g‘risidagi takliflari ma'qullanishi mumkin.

Noruda foydali qazilmalar xom-ashyolarini klasterlar usulida chuqur qayta ishlashni yo‘lga qo‘ygan holda quyidagilarga asosiy e'tibor qaratiladi:

sement xomashyosini, ohaktosh, gips va boshqa xom-ashyolarni qazib olish, ularni qayta ishlash, yuqori markali sement ishlab chiqarish va sementni qayta ishlash orqali quruq qurilish qorishmalari, zamonaviy temir-beton mahsulotlari hamda yangi turdagi qurilish materiallari, shu jumladan gazobeton kabi mahsulotlar ishlab chiqarish;

marmar va granit konlarini o‘zlashtirish, zamonaviy pardozbop qoplama toshlar ishlab chiqarish, shu jumladan plitka, mozaikalar, marmar va granitdan plitalar ishlab chiqarish;

grafit konini to‘liq o‘rganish, uni sanoat usulida qazib olish va chuqur qayta ishlash, grafit elektrod, tez zaryadlanuvchi akkumulyatorlar uchun grafit tayoqchalar (sterjin) va zamonaviy elektro-texnika sanoati uchun ehtiyot qismlar ishlab chiqarishni tashkil etish;

mineral bo‘yoqlar xom-ashyosi – oxrani qazib olishni tashkil etish, undan tayyor mahsulotlar, bo‘yoqlar, mineral to‘ldirgichlar va boshqa mahsulotlar ishlab chiqarish;

qum-shag‘al aralashmasi konlarni o‘zlashtirish, saralash va maydalash quvvatlarini barpo etish hamda inert materiallar (qum, shag‘al)dan tayyor temir-beton mahsulotlari, asfalt va yo‘l qurilishi materiallari ishlab chiqarishni tashkil etish.

Peshku qurilish materiallari klasterlarini tashkil etish bo‘yicha amalga oshirilishi rejalashtirilgan chora-tadbirlar yuzasidan “Yo‘l xarita”si hamda Peshku tumani hududida qurilish klasterlarini tashkil etishga doir tadbirlarni muvofiqlashtirish va amalga oshirishga ko‘maklashish bo‘yicha komissiya tasdiqlanadi.

Quyidagilar Komissiyaning (E.G‘aniyev) asosiy vazifalari etib belgilanadi:

a) Peshku tumanining Jongeldi massivida ishlab chiqarish korxonalarini joylashtirish imkoniyatlarini o‘rganish va mavjud bo‘lgan har bir qurilish materiallari xom-ashyolarini chuqur qayta ishlash loyihalari bo‘yicha alohida hududlarni belgilash.

Bunda, aniqlangan va belgilangan ishlab chiqarish hududlaridan infratuzilma obektlarigacha bo‘lgan masofa, shuningdek, Peshku qurilish materiallari klasterlari hududlariga eng kam xarajatlar bilan ulanishga alohida e'tiborni qaratish lozim.

b) Peshku qurilish materiallari klasterlari hududlarida investitsiya loyihalarni amalga oshirish maqsadida investorlarni, shu jumladan xorijiy investorlarni jalb qilish uchun:

mavjud sanoat usulida o‘zlashtirish imkoniyati bo‘lgan noruda foydali qazilmalarni chuqur qayta ishlash, tayyor qurilish materiallari ishlab chiqarishni tashkil etuvchi investitsiya loyihalari hamda istiqbolli uchastkalarda geologik o‘rganish ishlari olib borish bo‘yicha investorlarga takliflar tayyorlash;

investitsiya takliflarini investorlarga, shu jumladan xorijiy investorlarga yetkazish, xorijiy davlatlarda o‘tkaziladigan forumlarda mas'ul shaxslar ishtirokini ta'minlash;

qiziqish bildirgan investorlar bilan muzokaralar o‘tkazish va o‘rnatilgan tartibda qazilma konlardan foydalanish uchun litsenziyalar olishga ko‘maklashish;

talabgorlar yuqori bo‘lgan xom-ashyolarni qayta ishlash loyihalari bo‘yicha investorlar o‘rtasida tanlov o‘tkazish, salohiyatli investorlarni aniqlashga ko‘maklashish ishlarini tashkil etish.

v) Aniqlab olingan hududlar uchun infratuzilma tarmoqlarini qurish loyihalarini aniqlab olish, smeta hujjatlarini tayyorlash hamda Investitsiya dasturlariga kiritilishini ta'minlash va mazkur loyihalarni amalga oshirilishini tashkil etish.

g) Amalga oshirilayotgan loyihalarni moliyalashtirish uchun xalqaro moliya institutlari hamda xorijiy davlatlar moliya tashkilotlari kreditlari va grantlarini jalb etish.

Shuningdek, loyihalarni amalga oshirish uchun xorijiy va mahalliy investorlar faoliyatini boshlashga ko‘maklashish ishlarini tashkil etish.

g) mazkur qaror bilan tasdiqlangan “Yo‘l xarita”sida nazarda tutilgan tadbirlarni amalga oshirish bo‘yicha mas'ul ijrochilar faoliyatini muvofiqlashtirish, shuningdek, ushbu tadbirlarning sifatli va o‘z muddatlarida bajarilishini tashkil etish.

Tadbirkorlik sub'yektlariga, shu jumladan xorijiy investorlarga yer maydonlarini ajratib berishning asosiy shartlari etib quyidagilar belgilanadi:

tashkil etiladigan korxonada zamonaviy, resurslarni, shu jumladan energiyani tejovchi hamda atrof muhitga minimal zarar yetkazuvchi uskunalardan foydalanish;

foydali qazilma boyliklarini chuqur qayta ishlash hisobiga zamonaviy turdagi qurilish materiallar hamda boshqa tayyor mahsulotlar ishlab chiqarish;

ishlab chiqariladigan mahsulotning ikkinchi yildan boshlab kamida 30 foizini eksportga yo‘naltirish;

ishlab chiqarish jarayoniga jalb etiladigan ishchi xizmatchilarning kamida 80 foizini mahalliy mehnat resurslaridan foydalangan holda yollash.