Normativ-huquqiy hujjatlar loyihalari muhokamasi portalida “Epizootik vaziyatini o‘rganish maqsadida mutaxassislarni xorijiy mamlakatlarga yuborish zaruratini aniqlash mezonlari va yuborish tartibi to‘g‘risidagi nizomni tasdiqlash haqida”gi hujjat loyihasi joylashtirildi.
Epizootik vaziyatini o‘rganish maqsadida mutaxassislarni xorijiy mamlakatlarga yuborish zaruratini aniqlash mezonlari va yuborish tartibi to‘g‘risidagi nizomga ko‘ra, O‘zbekiston Respublikasi hududiga veterinariya jihatdan yuqori xavfga ega bo‘lgan davlat veterinariya xizmati nazorati ostidagi tovarlarni olib kirilishi ma'lum bo‘lganda, yangi savdo yo‘nalishlari ochilganda va xorijiy mamlakatlarning ma'lum bir hududlaridan davlat veterinariya xizmati nazorati ostidagi tovarlarni olib kelishda hayvonlarning o‘ta xavfli kasallik qo‘zg‘atuvchilari kirib kelishi xavfi mavjud bo‘lganda, yohud nosog‘lom epizootik hududda ishlab chiqarilgan davlat veterinariya xizmati nazorati ostidagi tovarlar olib kirilishi rejalashtirilgandagina ushbu tovarlar epizootik holatini o‘rganish maqsadida mutaxassislarni xorijiy mamlakatlarga yuborish zarurati vujudga keladi.
Quyidagi hollarda O‘zbekiston Respublikasi hududiga davlat veterinariya xizmati nazorati ostidagi tovarlarni olib kirish rejalashtirilganda mutaxassislarni yuborish orqali ular yetishtirilgan va ishlab chiqarilgan xorijiy mamlakat hududida veterinariya auditi va veterinariya inspeksiya tekshiruvi o‘tkazish majburiy hisoblanadi:
a) yuqori veterinariya xavfga ega bo‘lgan davlat veterinariya xizmati nazorati ostidagi tovarlarni olib kirishda:
barcha turdagi tirik hayvonlar (yovvoyi hayvonlar, sirk va zoopark hayvonlari, laboratoriya hayvonlari va nomahsuldor hayvonlar bundan mustasno);
termik ishlovdan o‘tmagan kelib chiqishi hayvonotga mansub mahsulot va xomashyo.
b) o‘rta veterinariya xavfga ega bo‘lgan davlat veterinariya xizmati nazorati ostidagi tovarlarni olib kirishda:
olib kirish rejalashtirilgan mamlakatda epizootiya tarqalganligi haqida ma'lumotlar mazkur davlat veterinariya xizmati tomonidan ma'lum qilinganda yoki veterinariya sohasidagi xalqaro tashkilot (Butunjahon hayvonlar sog‘ligini himoya qilish tashkiloti) rasmiy veb-saytlarida e'lon qilinganda;
xavfni baholash natijasida davlat veterinariya xizmati nazorati ostidagi tovarlarning veterinariya xavf darajasi yuqori deb belgilanganda.
Laboratoriya sharoitida “in vitro” usulida tayyorlangan hayvon embrioni hamda transplantatsiya uchun mo‘ljallangan naslli materiallar, hayvonlar kasalligiga qarshi vaksinalar ishlab chiqarish uchun mikroorganizm vaksina shtammlarini olib kelish uchun mutaxassis yuborish masalasi murojaatchining so‘roviga asosan alohida tartibda O‘zbekiston Respublikasi Veterinariya va chorvachilikni rivojlantirish davlat qo‘mitasi tomonidan ko‘rib chiqiladi.
