Toshkent, Zangiota va Chinoz tumanlaridagi yer maydonlari bo‘yicha hukumat qarori qabul qilinadi

Normativ-huquqiy hujjatlar loyihalari muhokamasi portalida Vazirlar Mahkamasining “Toshkent viloyatining Toshkent, Zangiota va Chinoz tumanlarida bo‘sh turgan yer maydonlaridan samarali foydalanish chora-tadbirlari to‘g‘risida”gi qarori loyihasi e'lon qilindi.

Hujjat bilan Toshkent viloyati Toshkent va Zangiota tumanlarida qishloq xo‘jaligida foydalanilmaydigan, bo‘sh turgan yer maydonlarida sanoatni rivojlantirish bo‘yicha investitsiya loyihalarining manzilli ro‘yxati tasdiqlanadi.

Toshkent viloyati hokimligi, O‘zbekiston Respublikasi Iqtisodiyot va sanoat vazirligi, Investitsiyalar va tashqi savdo vazirligi, Yer resurslari, geodeziya, kartografiya va davlat kadastri davlat qo‘mitasining quyidagi takliflariga rozilik berilishi mumkin:

Toshkent viloyati Toshkent tumanidagi qishloq xo‘jaligi yerlarini sanoat maqsadlariga mo‘ljallangan yerlar toifasiga o‘tkazish;

Toshkent viloyati Toshkent tumanida bo‘sh turgan, foydalanilmayotgan yer maydonlarida kichik sanoat zonalarini tashkil qilish;

Toshkent viloyati Toshkent Zangiota va Chinoz tumani hokimligi zaxirasidagi yer uchastkalari hamda manzilli dasturni amalga oshirish uchun ajratiladigan yer uchastkalari istisno tariqasida auksionsiz, tuman hokimlari hokimlarining qarori bilan, yer uchastkalarini elektron auksion orqali sotish uchun belgilangan boshlang‘ich qiymat miqdorini ikki yil davomida har chorakda mutanosib ravishda bo‘lib to‘lanishi sharti asosida loyiha tashabbuskorlariga biriktirib berish;
tushgan mablag‘lar “Obod qishloq” va “Obod mahalla” dasturlarini moliyalashtirish uchun to‘liq yo‘naltirish.

Toshkent viloyati hokimligi:

davlat va xo‘jalik boshqaruvi organlari, tijorat banklari va loyiha tashabbuskorlari bilan birgalikda manzilli ro‘yxatga kiritilgan investitsiya loyihalarining amalga oshirilishi bo‘yicha loyiha hujjatlarini ishlab chiqish va ekspertizadan o‘tkazish, qurilish-montaj ishlarini bajarish, zamonaviy texnologik asbob-uskunalar bilan butlash va loyihalarni foydalanishga topshirishning aniq muddatlari ko‘rsatilgan tarmoq jadvallarini ishlab chiqib tasdiqlaydi;

tegishli davlat va xo‘jalik boshqaruvi organlari va loyiha tashabbuskorlari bilan birgalikda manzilli ro‘yxatga kiritilgan investitsiya loyihalarining o‘z vaqtida va sifatli amalga oshirilishini, mo‘ljallangan ishlab chiqarish hajmlariga erishilishini, mablag‘larni samarali va to‘liq o‘zlashtirilishini hamda yangi ish o‘rinlari tashkil etilishini ta'minlaydi;

investitsiya loyihalarini amalga oshirishda muammoli masalalarni ko‘rib chiqib, ularni hal etish yuzasidan tezkor va zarur amaliy chora-tadbirlarni amalga oshirgan holda, loyihalar bajarilishi yuzasidan tizimli monitoring olib boradi.

Toshkent viloyati hokimligiga O‘zbekiston Respublikasi Investitsiyalar va tashqi savdo vazirligi hamda xizmat ko‘rsatuvchi tijorat banklari bilan kelishgan holda loyihalarning qiymati va ish o‘rinlari sonini saqlab qolish sharti bilan manzilli ro‘yxatga zaruratga ko‘ra o‘zgartirishlar kiritish huquqi beriladi.

O‘zbekiston Respublikasi Markaziy bankiga ushbu qarorda ko‘rsatilgan maqsadda, tijorat banklariga manzilli ro‘yxatga kiritilgan loyihalar bo‘yicha kredit shartnomalarining o‘z vaqtida rasmiylashtirilishi va moliyalashtirish boshlanishini ta'minlash tavsiya etiladi.

Bunda, belgilab qo‘yilishicha, O‘zbekiston Respublikasi Bandlik va mehnat munosabatlari vazirligi huzuridagi Bandlikka ko‘maklashish davlat jamg‘armasi mablag‘lari hisobidan tijorat banklari orqali Toshkent viloyati Toshkent, Zangiota va Chinoz tumanlarida yangi ish o‘rinlari tashkil etishni nazarda tutuvchi loyihalarni amalga oshirish uchun ajratiladigan kreditlar eng kam ish haqining 2500 baravarigacha bo‘lgan miqdorda 3 yillik muddatga, 6 oylik imtiyozli davr bilan, O‘zbekiston Respublikasi Markaziy banki qayta moliyalashtirish stavkasining 50 foizi miqdoridagi foiz stavkasi, shu jumladan, tijorat bankining ajratiladigan kredit stavkasining 50 foizi miqdoridagi marja bilan taqdim etiladi.

Uy-joy kommunal xizmat ko‘rsatish vazirligi, “O‘zbekenergo” AJ, “O‘ztransgaz” AJ va Toshkent viloyat hokimligiga kichik sanoat zonasida joylashtirilgan tadbirkorlik sub'yektlarini ularning ishlab chiqarish ehtiyojlariga muvofiq belgilangan tartibda elektr energiyasi, tabiiy gaz va boshqa turdagi kommunal xizmatlar bilan uzluksiz ta'minlash chorasini ko‘radi.

Toshkent viloyati hokimligi har chorak yakunida manzilli ro‘yxatga kiritilgan investitsiya loyihalarining o‘z vaqtida va sifatli bajarilishi bo‘yicha loyiha tashabbuskorlari faoliyatining natijadorligini viloyat va tuman faollari yig‘ilishlarida muhokama qilsin hamda amalga oshirilgan ishlar to‘g‘risida Vazirlar Mahkamasiga axborot kiritib borishni ta'minlaydi.