Qoʻshrabot tumanida mahalla raisi shilqimlik harakati uchun maʼmuriy jazoga tortildi. Kun.uz sud qarori bilan tanishdi.
Sud hujjatiga koʻra, Qoʻshrabot tumanidagi Katta Oqmachit mahallasi raisi 42 yoshli U.Ch. hududda yashovchi ayolga shahvoniy shilqimlik qilgan. U ayolga Telegram orqali yozib, jinsiy aloqa taklif etgan. Shuningdek, uyatli videolarni joʻnatgan.
U.Ch. sudda aybiga iqrorlik bildirmagan. U bu harakatlarni telefonidagi begona raqam kimligini bilish uchun turmush oʻrtogʻi sodir etganini aytgan.
Jabrlanuvchi ayol esa mahalla raisiga qonuniy chora koʻrishni soʻragan.
“Turmush oʻrtogʻim bilan oʻzaro kelishmovchilik sababli ota uyimga ketdim. Qaynonam, mahalla raisi U.Ch. hamda mahalla xotin-qizlar faoli kelib, bizni yarashtirmoqchi boʻldi. Meni yashash uyimga olib ketishdi. Oʻsha vaqtda mahalla raisi mening telefon raqamimni olib ketdi. Shundan buyon tinch qoʻymasdan, menga ishqiy munosabatda boʻlishni taklif qildi. Bir necha marotaba Telegram orqali pornografik videolarni tashladi. Shu sababli oilam buzilib ketishi mumkin”, degan ayol suddagi koʻrsatmasida.
Sud qarori bilan U.Ch. Maʼmuriy javobgarlik toʻgʻrisidagi kodeksning 41-1-moddasi 1-qismi (shahvoniy shilqimlik qilish) hamda 189-moddasi (pornografik mahsulotni tayyorlash, olib kirish, tarqatish, reklama qilish, namoyish etish)da nazarda tutilgan huquqbuzarliklarni sodir etgan deb topildi. Unga 5 sutka maʼmuriy qamoq jazosi tayinlandi.
