Kasbi tumanida 4 yoshli qizaloq oʻgay onasining kaltaklashi oqibatida jiddiy jarohatlanib, vafot etdi. Bu haqda Bolalar ombudsmani xabar berdi.
Maʼlum qilinishicha, 32 yoshli I.S. turmush oʻrtogʻi N.A. bilan oʻzaro nizolashib, uning 2022-yilda tugʻilgan qizini urgan. Oqibatda qizaloq bosh qismidan jiddiy jarohatlangan. Sogʻligi keskin yomonlashgan bola shu kunning oʻzida vafot etgan.
Holat yuzasidan Jinoyat kodeksining 126-1-moddasi 8-qismi “g” bandi (oilaviy zoʻravonlik jabrlanuvchining oʻlimiga sabab boʻlishi) bilan jinoyat ishi qoʻzgʻatilgan. I.S. gumonlanuvchi tariqasida protsessual tarzda ushlangan.
Hozirda dastlabki tergov harakatlari olib borilmoqda.
Bolalar ombudsmani mazkur jinoyat ishi yurituvi ustidan oʻz kuzatuvini davom ettirishini, holat yuzasidan qoʻshimcha tarzda axborot taqdim etilishini bildirgan.
Maʼlumot uchun, Jinoyat kodeksida bunday qilmishga 10 yildan 12 yilgacha ozodlikdan mahrum qilish jazosi tayinlanishi belgilangan.
