Toshkent shahar hokimining yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha o‘rinbosari Elbek Shukurov Kun.uzʼga bergan intervyusida poytaxtdagi ijtimoiy munosabatlar, xususan ta'lim va sog‘liqni saqlash tizimidagi masalalar haqida batafsil ma'lumot berdi.
— Toshkent shahri alohida xususiyatga ega, u nafaqat poytaxt, shahar-tuman sifatida boshqa viloyatlardan farqli jihati bor. Aholisi ham boshqa hududlarga qaraganda ko‘proq. Shu jihatdan ijtimoiy masalalarni ko‘tarish shahar-tuman miqyosida qiyinchilik tug‘dirmaydimi?
─ Albatta, buning o‘ziga yarasha qiyinchiligi bor. Toshkentda boshqa viloyatdagi hamkasblarimga qaraganda qiyinroq, desam ham noto‘g‘ri bo‘ladi. Chunki har bir hududning o‘ziga xos xususiyatlari bor. Tumanlarning ham o‘ziga yarasha xususiyatlari bor. Shu jihatlarni ham faoliyat davomida inobatga olish kerak. Misol uchun, Yunusobod, Mirzo Ulug‘bek tumanlarida ko‘p millatli aholi bo‘lganligi uchun shu hududlarda aholining ta'limga, ijtimoiy masalalarga qarashi sal boshqacharoq bo‘lishi mumkin. Shayxontohur, Uchtepa, Olmazor tumanlarida mahalliy aholi ko‘proq bo‘lgani uchun u yerda muhit boshqacha.
Bugungi kunda poytaxt aholisining zichligi, aholining talabi yuqoriligi, qonunchilik bilan yaqindan tanishligi, aholi savodxonligining yuqoriligi ham muhim rol o‘ynaydi. Shuning uchun yildan yilga aholining ehtiyojni qondirish qiyinroq bo‘lishi mumkin.
─ Boshqa hududlarda yozgi yoki qishki mavsumda asosiy primitv muammolar, gaz, energiya, suv muammosi yoki boshqa xizmatlarning ko‘rsatilishidan norozilik kuzatiladi. Sizning hududingizda ijtimoiy masalalarni amalga oshirishda qanaqa muammolar ko‘proq ko‘zga tashlanadi?
─ Ma'lum vaqt avval shu masalalar bizda ham bo‘lgan bo‘lsa, hozirda aholining talabi sifat masalasida kuchayib bormoqda. Masalan, maktablarning haddan tashqari koeffitsiyenti oshib ketgan holatlari mavjud. Ba'zi hududlarda 1000 o‘ringa 2000 o‘quvchi o‘qiyotgan holatlar bor. Uning yonidagi maktabda esa koeffitsiyent past, 1000 o‘rinda 700 nafar o‘quvchi o‘qiyotgan bo‘lishi mumkin. Ko‘p odamlar tomonidan bu maktabda sifat yaxshiroq degan narsalarni eshitamiz. Kundalik maishiy muammolardan ko‘ra ko‘proq aholi sifatga diqqatini qarata boshladi. Barcha ta'lim yo‘nalishlarida xususiy sektorning kirib borishi ularning o‘zaro raqobatini ham shakllantiryapti, davlat ta'lim muassasalarida ham raqobatchi bo‘lyapti. Qaysi maktabda sifatning qandayligi ko‘rinib qolyapti. Sifat jihatdan farq bo‘lishi mumkin, lekin aynan bugungi kunda koeffitsiyent oshib ketgan maktablarda sifat yaxshi degan stereotip bor. Bu ko‘plab yillar davomida odamlarda tarqalgan ma'lumot.
