DW xabariga koʻra, 2-oktabr kuni eʼlon qilingan hisobotlardagi oʻzgarishlarga «Vyorstka» nashri eʼtibor qaratgan. Maʼlumotlari yashirilgan qatorlar hujjatlarda kulrang bilan ajratilgan.
Cheklovlar davlat xavfsizligiga oid ishlar, siyosiy taʼqiblarda qoʻllanadigan moddalar hamda harbiylar va kuch tuzilmalari xodimlari jinoyatlariga doir maʼlumotlarni qamrab olgan.
Bedarak yoʻqolganlarga oid arizalar soni ham ochiqlanmagan
Yigʻma statistikada fuqarolarni vafot etgan yoki bedarak yoʻqolgan deb topish haqidagi sudga berilgan arizalar soni yashirilgan.
«Vyorstka» maʼlumotiga koʻra, 2024-yilda Sud departamenti bunday arizalar soni rekord darajaga - 17,5 mingtaga yetganini bildirgan edi.
2025-yil oxirida esa Rossiya sudlari shunday ishlarni koʻrib chiqishga oid maʼlumotlarni oʻz saytlaridan oʻchira boshlagan.
Davlatga xiyonat va josuslik ishlari boʻyicha raqamlar yopilgan
Nashrning yozishicha, Rossiya Jinoyat kodeksining siyosiy taʼqiblarda qoʻllanadigan 28 ta moddasi boʻyicha maʼlumotlar ham maxfiylashtirilgan.
Ular qatorida davlatga xiyonat, xorijiy davlatlar bilan hamkorlik, josuslik, davlat sirini oshkor qilish, diversiya, ekstremistik hamjamiyat tashkil etish va armiyani «obroʻsizlantirish»ga oid ishlar bor.
Shuningdek, «chet el agenti» majburiyatlarini bajarishdan boʻyin tovlash bilan bogʻliq statistika ham ochiqlanmagan.
Maʼmuriy ishlar orasida armiyani «obroʻsizlantirish», adovat qoʻzgʻatish, separatizmga chaqirish va «chet el agenti» faoliyati tartibini buzish boʻyicha maʼlumotlar yopilgan.
Kuch tuzilmalari xodimlari haqidagi maʼlumotlar ham yashirilgan
Sud departamenti harbiy xizmatchilardan tashqari sudyalar, prokurorlar, tergovchilar, politsiyachilar va Jazoni ijro etish federal xizmati xodimlari sodir etgan jinoyatlar boʻyicha statistikani ham ochiqlamagan.
Idora 2026-yil aprelida «Vajnyye istorii» nashriga bergan izohida sud statistikasiga kirish cheklanishini «maʼlumotlarni eʼlon qilish reglamenti oʻzgargani» bilan tushuntirgan.
