O‘zbekistonga Moskvadagi Butunrossiya ko‘rgazma markazi paviloni ajratiladi

Prezident 2019 yil 30 may kuni Urganch shahrida imzolangan hukumatlararo bitimni tasdiqladi. Bu haqda Norma xabar bermoqda.
 
“O‘zbekiston Respublikasi ko‘rgazma madaniy markazi” ekspozitsion markazi Moskva shahridagi Butunrossiya ko‘rgazma markazi hududidagi 66-pavilonda ochiladi.
 
1 478,5 kv. m o‘lchamli maydoncha (Moskva shahri, Mir prosp., 119-uy, 66-bino) ramziy to‘lov – yiliga 1 Rossiya rubli evaziga 49 yilga ijaraga beriladi. Bitimni avtomatik ravishda uzaytirish va, tegishincha, ijara munosabatlarini navbatdagi 49-yillik davrga xuddi shu shartlarda uzaytirish nazarda tutilgan.
 
Obekt O‘zbekiston tomoniga berilgunga qadar uning ichki qismi ta'mirlanadi va restavratsiya qilinadi. Tashqi qismini (fasad) joriy ta'mirlash ijaraga oluvchi hisobidan amalga oshiriladi.
 
Moskva Hukumati va Toshkent shahar hokimligi bitim tomonlarining vakolatli organlari hisoblanadi. O‘zbekiston Tashqi ishlar vazirligiga xalqaro shartnoma kuchga kirishi uchun davlatimiz tomonidan zarur bo‘lgan davlat ichki tartib-taomillari bajarilganligi va uni amalga oshirish uchun mas'ul bo‘lgan vakolatli organ haqidagi tegishli bildirishnomani Rossiya tomoniga yuborish topshirildi.
 
Mamlakatimizning majburiyatlari bajarilishi ustidan keyingi nazorat Vazirlar Mahkamasi va tegishli vazirlik va idoralar rahbarlariga zimmasiga yuklandi.
 
Hujjat 29.07.2019 yildan kuchga kirdi.