Bugun, 4 avgust kuni “Forish” tog‘ poligonida V Xalqaro armiya o‘yinlari doirasi O‘zbekistonda ilk marotaba o‘tkazilayogan “Harbiy-tibbiy estafeta” tanlovining tantanali ochilish marosimi bo‘lib o‘tdi.
Unda O‘zbekiston Mudofaa vaziri general-mayor Bahodir Qurbonov, Jizzax viloyati hokimi Ergash Saliyev hamda uning o‘rinbosarlari, okrug qo‘mondonlari, Rossiya mudofaa vaziri o‘rinbosari armiya-generali Timur Ivanov, turli davlatlardan kelgan harbiy attashelar, OAV vakillari hamda estrada yulduzlari ishtirok etdi.
Bahodir Qurbonov birinchi bor O‘zbekistonda o‘tkazilayotgan “Harbiy-tibbiy estafeta” tanlovini ochib berdi va musobaqa ishtirokchilariga muvaffaqiyat tilab, eng kuchli jamoa g‘olib chiqishiga tilak bildirdi:
“Avvalambor aziz mehmonlarimiz, harbiy-tibbiy estafetasi qatnashchilarini bizning mehmondo‘st diyorimiz va serquyosh yurtimiz — O‘zbekistonda samimiy qutlamoqchiman. Bugun biz o‘z mahoratini, harbiy xizmatga zarur bo‘lgan eng oliy sifatlarini: malaka, qat'iy xarakter, professionallik va intizom, uyg‘unlikda va aniq harakatlana olish hamda haqiqiy jangovar vaziyatda nafaqat muvaffaqiyat, balki birinchi navbatda insonlarning hayoti va sog‘ligini belgilovchi tezda qaror qabul qilish qobiliyatini namoyon etadigan harbiy-tibbiyot professionallari bellashuviga start bermoqdamiz.
Shubhasiz, barcha qatnashuvchilar munosib tarzda sinovlardan o‘tib, o‘zlarining yuqori professional mutaxassislar ekanliklarini yana bir bor tasdiqlaydilar.
Ijozatingiz bilan O‘zbekiston Respublikasida o‘tkazilayotgan ArMI—2019 Harbiy-tibbiy estafetasiga “start” berib, uni ochiq deb e'lon qilaman!”
