«Xususiy bandlik agentliklari to‘g‘risida»gi qonunga o‘zgartirish kiritiladi

“Xususiy bandlik agentliklari to‘g‘risida”gi qonunga o‘zgartirish va qo‘shimchalar kiritiladi. Tegishli loyiha muhokama uchun e'lon qilindi.

Qonunning 15-moddasi (Xususiy bandlik agentliklari tomonidan xizmatlar ko‘rsatish to‘g‘risidagi shartnoma) quyidagi tahrirdagi uchinchi qism bilan to‘ldiriladi:

“Xizmat ko‘rsatish to‘g‘risidagi shartnoma har bir xizmat turi bo‘yicha alohida tuziladi:

O‘zbekiston Respublikasidan tashqaridagi ishni qidirayotgan shaxslarni ishga joylashtirish bo‘yicha;

ishga joylashtirish sohasida axborot va maslahat xizmatlari bo‘yicha”;

quyidagi tahrirdagi 15-1-modda bilan to‘ldiriladi:

“15-1-modda. Shartnomalar asosida O‘zbekiston Respublikasidan tashqarida ishga joylashtirish va axborot-maslahat xizmatlari bo‘yicha to‘lov shartlari

Ishga joylashtirish sohasida axborot va maslahat xizmatlari uchun to‘lov miqdori xususiy bandlik agentligi va ish qidirayotgan shaxs o‘rtasidagi o‘zaro kelishuvga ko‘ra belgilanadi, biroq qonunchilikda belgilangan bazaviy hisoblash miqdorining uch barobaridan oshmasligi lozim.

O‘zbekiston Respublikasidan tashqaridagi ishni qidirayotgan shaxslarni ishga joylashtirish uchun to‘lov miqdori xususiy bandlik agentligi va ish qidirayotgan shaxs o‘rtasidagi o‘zaro kelishuvga ko‘ra belgilanadi, biroq ishga joylashgan joydagi xorijiy ish beruvchi tomonidan tasdiqlangan bir oylik ish haqi miqdoridan oshmasligi lozim.

O‘zbekiston Respublikasidan tashqaridagi ishni qidirayotgan shaxslarni ishga joylashtirish bo‘yicha shartnoma imzolangandan so‘ng ish qidirayotgan shaxs 2 (ikki) ish kun ichida jo‘natuvchi tashkilot xizmatlari narxining 15 foizidan ko‘p bo‘lmagan miqdorda oldindan to‘lovni amalga oshiradi.

To‘lanadigan taxminiy to‘lov miqdori xususiy bandlik agentligi va ish qidirayotgan shaxs o‘rtasidagi o‘zaro kelishuvga ko‘ra belgilanadi, biroq qonunchilikda belgilangan bazaviy hisoblash miqdorining o‘ttiz barobaridan ko‘p bo‘lmasligi lozim.

Xususiy bandlik agentligi tomonidan ko‘rsatilgan xizmatlar uchun yakuniy hisob-kitoblar ish qidirayotgan shaxs tomonidan ishchi viza, mehnat shartnomasi loyihasi yoki chet ellik ish beruvchi tomonidan taqdim etilgan va ishga joylashishni kafolatlaydigan boshqa hujjat taqdim etilgandan so‘ng amalga oshiriladi.

Xorijda ish bilan ta'minlash to‘g‘risidagi shartnoma xususiy bandlik agentligi tomonidan O‘zbekiston Respublikasi Bandlik va mehnat munosabatlari vazirligining «labor-migration» dasturiy ta'minoti elektron bazasida ro‘yxatdan o‘tkaziladi”;

17-moddaning (Xususiy bandlik agentligining majburiyatlari) birinchi qismi quyidagi tahrirdagi o‘ninchi xatboshi bilan to‘ldiriladi:

“qonun hujjatlarida belgilangan shartlarda va tartibda, O‘zbekiston Respublikasidan tashqaridagi ishni qidirayotgan shaxslar oldida o‘z shartnomaviy majburiyatlarini bajarmaganligi yoki lozim darajada bajarmaganligi bilan bog‘liq yetkazilgan zararni qoplash uchun fuqarolik javobgarligini sug‘urtalashi shart”;

18-moddaning (Ish beruvchilarning va ish qidirayotgan shaxslarning huquqlari) birinchi qismi quyidagi tahrirdagi beshinchi xatboshi bilan to‘ldiriladi:

“qonun hujjatlarida belgilangan shartlarda va tartibda, xususiy bandlik agentligi tomonidan shartnomaviy majburiyatlarni bajarmaganligi yoki lozim darajada bajarmaganligi bilan bog‘liq yetkazilgan zararni qoplash uchun fuqarolik javobgarligini sug‘urtalash”;

20-moddaning (O‘zbekiston Respublikasi Bandlik va mehnat munosabatlari vazirligining xususiy bandlik agentliklari faoliyatini tartibga solish sohasidagi vakolatlari) birinchi qismi quyidagi tahrirdagi o‘ninchi xatboshi bilan to‘ldiriladi:

“O‘zbekiston Respublikasi Bandlik va mehnat munosabatlari vazirligining «labor-migration» dasturiy ta'minoti elektron bazasi ma'lumotlarining monitoringi, hisobotlar tahlili, shuningdek jismoniy va (yoki) yuridik shaxslar murojaatlari asosida vakolatli organ bilan kelishmasdan xususiy bandlik agentliklar faoliyatini kameral, nazorat tekshiruvini o‘tkazish huquqiga ega.”;

23-moddaning (O‘zbekiston Respublikasidan tashqaridagi ishni qidirayotgan shaxslarni ishga joylashtirish bo‘yicha faoliyatni amalga oshirish uchun litsenziya berish) uchinchi qismi oltinchi xatboshidagi “ellik ming AQSh dollari miqdoridagi” degan so‘zlar “milliy valutadagi ellik ming AQSh dollari ekvivalentida” degan so‘zlar bilan almashtiriladi.