Prezident tomonidan «Rieltorlik faoliyati to‘g‘risida»gi qonun imzolandi. Hujjat rieltorlik sohasidagi munosabatlarni huquqiy jihatdan tartibga solishga qaratilgan.
Qonunga muvofiq, Davlat aktivlarini boshqarish agentligi rieltorlik sohasidagi vakolatli davlat organi etib belgilandi.
Endilikda rieltorlik faoliyati bilan shug‘ullanish uchun nomzodlar maxsus o‘quv dasturini tamomlab, malaka imtihonidan muvaffaqiyatli o‘tishi lozim. Shundan so‘ng ularga professional jamoat birlashmasi tomonidan shtrix kodli malaka sertifikati beriladi.
Shuningdek, rieltor faqat rieltorlik tashkiloti tarkibida faoliyat yuritishi mumkin. Rieltorlik tashkilotlari va ko‘chmas mulk bo‘yicha agentlar esa o‘zlari haqidagi ma’lumotlar Yagona reyestrga kiritilgan kundan boshlab xizmat ko‘rsatish huquqiga ega bo‘ladi.
Qonunga ko‘ra, rieltorlik xizmatlari ko‘chmas mulk ob’yektlari va ularga bo‘lgan huquqlarga doir bitimlarda vositachilik qilish, ko‘chmas mulk savdosini tashkil etish, ob’yektlarni ishonchli boshqarish, shuningdek, ko‘chmas mulk bozorida axborot, maslahat va reklama xizmatlarini ko‘rsatishni o‘z ichiga oladi.
Bundan tashqari, xususiy sektor tomonidan tashkil etiladigan multilisting tizimi joriy etiladi. U rieltorlik xizmatlarini «yagona darcha» tamoyili asosida ko‘rsatish, muddatli shartnomalar bo‘yicha ishlash va bozor ishtirokchilari o‘rtasida elektron shaklda ishonchli axborot almashinuvini ta’minlash imkonini beradi.
