Suriyada al-Bag‘dodiyning opasi ushlangani ma'lum qilindi 

Suriyada IShIDning yaqinda yo‘q qilingan yetakchisi Abu Bakr al-Bag‘dodiyning opasi Rasmiya Avaz ushlandi. Bu haqda turk amaldoriga iqtibos keltirgan holda Associated Press axborot agentligi xabar berdi. 

Ta'kidlanishicha, 65 yoshli Avaz IShID bilan aloqalarda ayblanmoqda. U 4 noyabr oqshomidagi reyd vaqtida treyler konteynerida aniqlangan. Ayol Suriyaning Halab viloyatidagi Azaz shahri yaqinida oilasi bilan birga yashagan. Bu hudud hozirda Turkiya nazoratidagi hudud hisoblanadi. 

Manbaning ma'lum qilishicha, Avaz bilan birga uning turmush o‘rtog‘i, kelini va 5 farzandi ushlangan. Oilaning balog‘atga yetgan a'zolari so‘roq qilingan. Manba al-Bag‘dodiyning opasi razvedkaga foyda keltirishi mumkinligini ta'kidlab o‘tgan.

“Bunday narsalar – razvedka uchun noyob topilmadir. U IShID haqida biladigan ma'lumotlar guruh haqidagi tasavvurimizni kengaytirishi va ko‘proq terrorchilarni ushlashimizda yordam berishi mumkin”, deb aytgan turkiyalik amaldor.

Avvalroq IShIDning sobiq yetakchisi al-Bag‘dodiy amerikalik harbiylarning maxsus reydi davomida yo‘q qilingandi. Keyinroq IShID o‘z yetakchisi o‘lganini tan olgan va uning o‘rniga yangi yetakchi tayinlaganini e'lon qilgan.