MSK raisi qayta saylov o‘tkaziladigan okruglar soni oshishi mumkinligini istisno etmadi

23 dekabr kuni Xalqaro matbuot markazida o‘tkazilgan matbuot anjumanida MSK raisi Mirzo-Ulug‘bek Abdusalomov ikkinchi tur o‘tkazilishi mumkin bo‘lgan okruglar soni oshishi ehtimoli haqidagi savolga javob qaytardi.

«Qayta takroriy ovoz beradigan nomzodlar ro‘yxati e'lon qilindi. Ularning soni 22 nafar. Qaysi hollarda ular qayta saylanadi? 50 foizdan kam ovoz to‘plagan holda qayta saylov o‘tkaziladi.

Jizzax viloyatida 5 nafar, Qashqadaryo viloyatida 3 nafar nomzod qayta saylanadi. Buxoro, Navoiy va Sirdaryo viloyatlaridagi okruglarda esa barcha deputatlar yetarli ovoz to‘play olishdi.

Qayta saylovlarda ham partiyalarga targ‘ibot-tashviqot tadbirlari o‘tkazishlari uchun imkoniyat beriladi. Kuzatuvchilar taklif etiladi. Mablag‘ masalasida hech qanday muammo bo‘lmaydi. Qonunbuzilish holatlari keyinchalik ham aniqlanadigan bo‘lsa, 22 nafar nomzodlar soni ko‘payishi ham mumkin. Qonunchilikka ko‘ra, qonunbuzilish holatlari haqida saylov o‘tganidan keyin 10 kun ichida MSKga xabar qilinishi zarur. Shu muddat ichida qonunbuzilish bo‘yicha yetarli faktlarga ega bo‘lsak, tegishli choralarni ko‘ramiz», dedi MSK raisi.