Addis-Abebada Afrika ittifoqining 33-sammiti ish boshladi

Afrika ittifoqi qit'aning 55 davlatini birlashtirgan bo‘lib, 2002 yil yozda Afrika birligi tashkiloti o‘rniga tashkil etilgan.

Efiopiya poytaxti Addis-Abeba shahrida Afrika ittifoqining (AI) 33-sammiti ochildi. Bu haqda eNCA telekompaniyasi xabar berdi.

Qayd etilishicha, uchrashuv yopiq majlis bilan boshlangan. Unda kun tartibidagi qator masalalar aniqlab olinadi, asosiy o‘rinda Liviyadagi vaziyat turadi. Sammitga Misr prezidenti Abdul Fattoh as-Sisiy raislik qilmoqda.

Ushbu sammitning bosh mavzusi - "Qurolning ovozini o‘chirish: Afrika taraqqiyoti uchun qulay sharoitlar yaratish". Sammitda bundan yetti yil avval bo‘lib o‘tgan sammitda 2020 yilga kelib Afrikada urush va genotsidga barham berish borasidagi qaror doirasida nimalarga erishilgani tahlil qilinadi.

Sammitda Afrika ittifoqiga raislik qilish vakolati Misrdan Janubiy Afrika Respublikasiga (JAR) o‘tadi. JAR prezidenti Siril Ramaposa yaqin 12 oy uchun ikkita muhim mavzuni belgilab oldi: Liviyadagi vaziyatni izga solish va Janubiy Sudanda tinchlik kelishuvini to‘liq amalga oshirish.

JAR shuningdek, rais sifatida 1 iyuldan Afrika erkin savdo kontinental hududida (AfCFTA) savdo operatsiyalari boshlanishini ta'minlashi kerak bo‘ladi. Qit'aning jami 1,27 mlrd nafar aholiga ega 54 mamlakatini qamrab olgan mazkur hudud amalda faoliyatini boshlaydi.

Afrika ittifoqi qit'aning 55 davlatini birlashtirgan bo‘lib, 2002 yil yozda Afrika birligi tashkiloti o‘rniga tashkil etilgan. Uning bosh qarorgohi Addis-Abebada joylashgan.