Toshkentda xalqaro konferensiya ish boshladi

Bugun, 18 fevral kuni Toshkent shahrida «O‘zbekiston Respublikasida davlat va jamiyat qurilishining yangi bosqichi, mamlakatni demokratik modernizatsiyalashda parlament va hokimlik vakillik organlarining rolini oshirish» mavzusidagi xalqaro konferensiya ish boshladi.

Konferensiyada Oliy Majlis Senati a'zolari va Qonunchilik palatasi deputatlari, mahalliy hokimiyat vakillik organlari, vazirlik va idoralar, sud tizimi, huquqni muhofaza qilish organlari, fuqarolik jamiyati institutlari, ommaviy axborot vositalari vakillari, O‘zbekiston Respublikasidagi diplomatik missiyalar, xalqaro hamda mintaqaviy tashkilotlar, yetakchi konsalting kompaniyalari rahbarlari ishtirok etmoqda.

Senat raisi Tanzila Norboyeva tadbirni kirish so‘zi bilan ochar ekan, davlatning barcha idoralari xalq bilan birgalikda yuqori iqtisodiyotga, yetuk va har tomonlama fuqarolik jamiyatiga ega «Yangi O‘zbekistonni shakllantirish»da sezilarli amaliy ishlar olib borilayotganini ta'kidlab o‘tdi.

«Bugun jamiyatimizda yangilanish yo‘lida olib borilayotgan islohotlarda jamoatchilik o‘rni alohida ahamiyat kasb etadi. Senatorlar va deputatlarning xalq vakillari sifatida yanada tashabbuskor bo‘lishlari lozimligi ta'kidlandi. Bu borada «Jamiyat – islohotlar tashabbuskori» degan yangi g‘oya kundalik hayotimizga kirib borishi lozim.

Ijro hokimiyati vakillarini mas'uliyatga chaqirish hamda ularning xalq va parlament oldida hisobdorligini oshirish parlamentning ijro hokimiyati ustidan nazorat faoliyatini kuchaytirish borasidagi eng asosiy omillari va maqsadlaridan biriga aylandi. O‘z o‘rnida, nafaqat barcha vazir va hokimlarning palatalar oldida, balki ijro hokimiyatining tegishli pog‘ona vakillari mahalliy Kengashlar oldida hisobot berishi yo‘lga qo‘yildi.

Shu bilan birga, barcha senatorlarning xalq bilan muloqot olib borishida samarali mexanizm joriy qilish maqsadida bevosita barcha mahalliy Kengashlar bilan hamkorlikda ishlash yo‘lga qo‘yildi. Senatorlarning mahalliy Kengashlarning 6570 nafar deputati bilan hamjihatlikda ishlash tizimini joriy qilish yo‘lida tegishli o‘qishlar tashkil qilindi, ular bilan hamkorlikda amalga oshiriladigan tadbirlar belgilandi. Bundan asosiy maqsad joylardagi deputatlarning faolligini oshirish bilan birgalikda ularning haqqoniy deputatlik nazoratini shakllantirish va rivojlantirishdan iboratdir», deya Norboyevaning so‘zlarini keltirmoqda Kun.uz muxbiri.

Shuningdek, Senat raisi gender tenglik hamda yoshlar manfaatlarini ta'minlash masalalari deputatlar kun tartibidagi asosiy vazifalardan bo‘lishini ta'kidladi.