«MEI» milliy tadqiqot universiteti» filialining tuzilmasi tasdiqlandi 

Toshkent shahridagi “MEI” milliy tadqiqot universiteti” Federal davlat budjeti oliy ta'lim muassasasi filialining tuzilmasi tasdiqlandi.

Filial ijrochi direktoriga, zarur hollarda, Oliy va o‘rta maxsus ta'lim vazirligi hamda “MEI” milliy tadqiqot universiteti” Federal davlat budjeti oliy ta'lim muassasasi (Rossiya Federatsiyasi) bilan kelishgan holda, Filialning tuzilmasiga oliy ta'lim muassasasi uchun belgilangan normativlarga muvofiq xodimlarning umumiy cheklangan soni doirasida o‘zgartirishlar kiritish huquqi berildi.

Oliy va o‘rta maxsus ta'lim vazirligi, Energetika vazirligi, “Issiqlik elektr stansiyalari” AJ, “O‘zbekiston milliy elektr tarmoqlari” AJ, “Hududiy elektr tarmoqlari” AJ, “O‘zbekgidroenergo” AJ “MEI” milliy tadqiqot universiteti” Federal davlat budjeti oliy ta'lim muassasasi (Rossiya Federatsiyasi) bilan birgalikda ikki oy muddatda Filialda pedagogik va ilmiy salohiyatga ega, yuqori malakali, rus va ingliz tillarini o‘zlashtirgan, axborot texnologiyalarini hamda fan va texnikaning eng so‘nggi yutuqlarini o‘quv jarayoniga joriy eta oladigan professor-o‘qituvchilar tarkibini shakllantirish choralarini ko‘radi.

Belgilanishicha, talabalarni to‘lov-kontrakt asosida o‘qitish qiymati “MEI” milliy tadqiqot universiteti” Federal davlat budjeti oliy ta'lim muassasasi (Rossiya Federatsiyasi), Oliy va o‘rta maxsus ta'lim vazirligi hamda Energetika vazirligi bilan kelishilgan holda Filial tomonidan tasdiqlanadi.

“Issiqlik elektr stansiyalari” AJ, “O‘zbekiston milliy elektr tarmoqlari” AJ, “Hududiy elektr tarmoqlari” AJ va “O‘zbekgidroenergo” AJ:

2020  yil 1 avgustga qadar Filialga berilgan - Toshkent shahar, Olmazor tumani, Qoraqamish 3-ko‘chasi manzilida joylashgan bino va inshootlarning, shu jumladan, o‘quv laboratoriya binolari va sport inshootlarining rekonstruksiya ishlarini tugallash, shuningdek, to‘laqonli o‘quv jarayonini tashkil etish maqsadida ularni zamonaviy o‘quv-laboratoriya uskunalari, kompyuter va tashkiliy texnika, o‘quv va ilmiy adabiyotlar, inventarlar, mebel va boshqa moddiy-texnik vositalar bilan ta'minlash;

2021 yil 1 avgustga qadar Filial talabalari va o‘qituvchilari uchun yotoqxona binosi qurilishini tugallash choralarini ko‘radilar.