«Dunyo» axborot agentligi xabariga koʻra, Oʻzbekistonning Londondagi elchixonasida Xeriot-Uatt universiteti rahbariyati bilan muzokaralar oʻtkazildi.
Uchrashuvda taʼlim, fan va innovatsiyalar sohasida qoʻshma loyihalarni amalga oshirish, professor-oʻqituvchilar hamda talabalar almashinuvini rivojlantirish masalalari koʻrib chiqildi. Shuningdek, ilmiy tadqiqotlar va malaka oshirish yoʻnalishlarida hamkorlik qilish istiqbollari muhokama etildi.
Muzokaralarning asosiy mavzularidan biri universitetning Oʻzbekistonda oʻz kampusini ochish imkoniyati boʻldi. Hozircha kampusni ochish boʻyicha yakuniy qaror yoki uning ish boshlash muddati haqida maʼlumot berilmagan.
Universitet vakillari Oʻzbekiston oliy taʼlim muassasalari bilan aloqalarni kengaytirishga tayyor ekanini bildirdi. Xususan, qoʻshma taʼlim loyihalarini yoʻlga qoʻyish, professor-oʻqituvchilar uchun malaka oshirish dasturlari va treninglar tashkil etish hamda birgalikda ilmiy tadqiqotlar oʻtkazishga qiziqish bildirildi.
Tomonlar «ikki tomonlama diplom» tamoyili asosida hamkorlik qilish imkoniyatlarini ham koʻrib chiqdi.
Xeriot-Uatt universiteti 1821-yilda Shotlandiyada «Edinburg sanʼat maktabi» nomi bilan tashkil etilgan. Oliygoh ilmiy tadqiqotlar va taʼlimdagi innovatsion yondashuvlari bilan tanilgan.
«Dunyo» AA keltirgan maʼlumotlarga koʻra, universitetda xorijiy kampuslari bilan birga qariyb 31 ming talaba tahsil oladi, 2 mingdan ortiq oʻqituvchi faoliyat yuritadi.
