17:23 / 10.03.2020
38877
Самарқанддаги «тўполончи қизлар». Улар нега байрам куни жанжал чиқарганди?

8 март куни интернетда бир гуруҳ қизларнинг расмий тил билан айтганда, ички ишлар ходимларига «фаол қаршилик қилаётгани» тасвирланган видео тарқалганди. Воқеа Самарқандда бўлган ва видео бўйича кўплаб тахминлар айтилди. Улардан энг кўп тарқалганига кўра, қизлар гўёки ичиб олиб шаҳардаги машҳур кафенинг ўртасида стриптиз уюштирмоқчи бўлган. Бу гаплар қанчалик ҳақиқатга яқин эканини билиш мақсадида Kun.uz мухбири суриштирув ўтказди.

Самарқанд шаҳри Сартепа мавзесида жойлашган «2-ГОМ»да бу видеодаги қизлар Kun.uz мухбирининг саволларига жавоб берди. Уларнинг айтишича, воқеа бундай бўлган: қизлардан бири М.И ўз туғилган кунини нишонлаш мақсадида Сартепа масканидаги ўша жанжал кўтарилган кафега борган. 8 март куни туғилган кунини нишонлашни режалаштирган қиз бир кун олдин жой буюртма қилиб 700 минг сўм «залог» берган. Унинг тусмолича дугоналари иштирокидаги базми жамшид 1,5 миллион сўмга тушиши керак бўлган ва шу боис пулнинг тахминан ярмини олдиндан берган.

8 март соат 20:00 лар чамасида қизлар кафега келишган. Улар спиртли ичимлик ичгач (кафе официантларининг айтишича, ўша столдагилар 8 шиша ароқ ичган) сармаст бўлиб рақс тушган. Рақслар шундай уятсиз кўриниш олганки, атрофда ўтирган бошқа мижозлар видеодаги қизлардан норози бўлган. Мижозларнинг баъзилари тоқат қилолмай кетиб ҳам қолган. Шунда кафе ходимлари 15 кишидан иборат қизлар гуруҳини (улар орасида икки эркак ҳам бўлган) бошқа залга ўтказиб жой қилиб беришган.

Аммо қизларнинг шўх рақслари бу ерда ҳам давом этгач кафе ходимлари Миллий гвардия зобитларига мурожаат қилишга мажбур бўлган. Зобитлар қизлардан ўтиришни тўхтатишни талаб қилган (официант йигитларнинг айтишича, Миллий гвардия зобитлари байрам бўлгани учун қизларга қўполлик қилмаган). Туғилган кун соҳиби ва дугоналари зобитлар талабидан сўнг кафедан чиқиб кетишга рози бўлган.

Улар кафедан чиқиши билан можаро бошланган. Официант табиийки, еган нарсалари учун пулни тўлашларини талаб қилган. Қизлар эса ўзи буюртма қилган ҳамма нарса олиб келинмаганини, ҳали байрам торти кесилмаганини (бунга алоҳида урғу берган) айтиб, пул бермаслигини айтган. Шундан жанжал бошланган. Қизлардан бирини кафе олдидаги йигит туртиб ҳам юборган. Официант йигитнинг айтишича, қизлар ўша йигитнинг хотинини куракда турмайдиган гаплар билан ҳақоратлаган.

Кейин аҳвол жиддийлашгач Миллий гвардия зобитлари қизларни машинага ўтқазиб ички ишлар бўлинмасига юборишга қарор қилган. Аммо бу вақтда қизлар юқорида айтганимиздек «фаол қаршилик кўрсатган». Оқибатда ўртада кичик жанжал юзага келган. Уч нафар қиз ИИБ бўлимига олиб кетилган.

Kun.uz мухбирининг саволларига жавоб берган қизларнинг ҳаммаси уларга иккинчи овқат тортилмагани, торт ҳам берилмагани, бунинг устига ўтириш соат 23:00 гача давом эттирилиши керак бўлган ҳолатда белгиланган вақтдан олдин чиқариб юборилганини айтди. Аммо кафе иш бошқарувчиси ва ўша куни хизматда бўлган официант барча таомлар тортилганини, қўшимчасига қизларнинг столига учта қўшимча ароқ берилганини айтди.

Кафе официанти иш юзасидан бир гапни айтди. Эмишки, қизларнинг даврасидаги тинчлик уларнинг сафига икки эркак қўшилганидан кейин бузилган. Ходим бу эркакларнинг кафега кириб келиши ва қизларнинг даврасига қўшилганини назорат камерасида кўрсатди. Дарвоқе, кафе ходими назорат камерасида барча ҳолатларни Kun.uz мухбирига кўрсатди ва уларнинг ҳеч бирида қизларнинг стриптиз тушишга уриниши кўринмаган.

Стриптиз, қўпол бўлса ҳам, бу бутунлай бошқа турдаги шаҳвоний рақс ва у учун махсус деталлар талаб қилинади. Аммо қизлар чиндан куракда турмайдиган хурмача қилиқлар қилгани рост ва бу камерада кўринган.

Бу жанжаллар юзасидан бугун Самарқанд шаҳар маъмурий судида суд мажлиси бўлиб ўтди. Унга кўра, туғилган кун соҳиби ва жанжал марказида бўлган М.Ига 5 кунлик маъмурий қамоқ жазоси берилган бўлса, унинг яна икки дугонасига 3 БҲМ (базавий ҳисоблаш миқдори) миқдорида жарима белгиланди.

Top