O‘zbekiston tibbiy niqoblar eksportini to‘xtatadi

O‘zbekistonda 16 martdan boshlab tibbiy niqoblar eksporti to‘xtatiladi. Bu haqda bosh vazir Abdulla Aripov raisligida koronavirus infeksiyasi kirib kelishining oldini olish chora-tadbirlarini kuchaytirishga bag‘ishlangan matbuot anjumani vaqtida e'lon qilindi.

Shuningdek, O‘zbekistonda himoya niqoblarini ishlab chiqarish o‘n marotabaga oshirildi va birinchi marta himoya kombinezoni ishlab chiqarilishi boshlandi.

«Ikki oy oldin bizda sog‘liqni saqlash sohasi xodimlari uchun himoya kombinezoni ishlab chiqarmasdik. Ikki oy ichida nafaqat ishlab chiqarishni yo‘lga qo‘ydik, balki ikki samolyotini Xitoyga jo‘natdik, bir samolyotini Eronga jo‘natyapmiz. O‘zimizda yetarli zaxira mavjud.

Tibbiy niqob yetishmovchiligi masalasiga kelsak, bu butun dunyoda kuzatilmoqda. Hozir tibbiy niqob ishlab chiqarish uch oy oldingiga nisbatan 10 baravardan ko‘proq oshirdik. Ertadan boshlab tibbiy niqoblarni chet elga eksport qilish to‘xtatiladi, barchasi ichki bozorga yo‘naltiriladi.

Buning ustida ishlaymiz, narxlar eski holatiga qaytariladi. Qo‘shtirnoq ichidagi tadbirkorlar boshqalar boshiga tushgan sinovdan boyishiga yo‘l qo‘yilmaydi», deya hukumat rahbarining so‘zlarini keltirmoqda Kun.uz muxbiri.