Fuqarolar yig‘inlari faoliyati baholanadi

Vazirlar Mahkamasining “Fuqarolar yig‘inlari va profilaktika inspektorlari faoliyati samaradorligini baholashning reyting tizimini takomillashtirish to‘g‘risida”gi qarori loyihasi e'lon qilindi.

Hujjat bilan fuqarolar yig‘inlari va profilaktika (katta) inspektorlari faoliyati samaradorligini baholashning reyting tizimi to‘g‘risidagi nizom tasdiqlanadi.

Vazirliklar, idoralar va boshqa tashkilotlar Fuqarolar yig‘inlari va profilaktika (katta) inspektorlari faoliyati samaradorligini baholashning reyting tizimi to‘g‘risidagi nizomda nazarda tutilgan ma'lumotlarni tuman (shahar) mahalla va oilani qo‘llab-quvvatlash bo‘limining so‘roviga muvofiq taqdim etilishi va ularning haqqoniyligini ta'minlash choralarini ko‘radi.

Qoraqalpog‘iston Respublikasi Vazirlar Kengashi, viloyatlar va Toshkent shahar hamda tuman (shahar) hokimliklari reyting baholash natijalari bo‘yicha fuqarolar yig‘inlari, ularning xodimlari, profilaktika (katta) inspektorlari va jamoatchilik asosida mehnat qilayotgan shaxslarni rag‘batlantirish uchun zarur bo‘lgan mablag‘lar mahalliy budjetning orttirilgan qo‘shimcha mablag‘lari hisobiga ajratilishini ta'minlaydilar.

Mahalla va oilani qo‘llab-quvvatlash vazirligining Fuqarolar yig‘inlari va profilaktika (katta) inspektorlari faoliyati samaradorligini baholashning reyting tizimi to‘g‘risidagi nizom talablariga muvofiq fuqarolar yig‘inlari xodimlari, profilaktika (katta) inspektorlari va jamoatchilik asosida mehnat qilayotgan shaxslarga respublika hududidagi sanatoriylardan birida sog‘lig‘ini tiklash uchun bir marotabalik bepul yo‘llanma berish to‘g‘risidagi taklifi ma'qullanishi mumkin.

Fuqarolar yig‘inlari va profilaktika (katta) inspektorlari faoliyati samaradorligini baholashning reyting tizimi to‘g‘risidagi nizomga ko‘ra, fuqarolar yig‘inlari faoliyatini reyting baholashda (keyingi o‘rinlarda reyting baholash deb ataladi) fuqarolar yig‘inida yashovchi aholining ijtimoiy hayotida mavjud bo‘lgan jami muammolar (ular xonadonma-xonadon yurish orqali) aniqlanadi.

Ushbu muammolar – yechimi fuqarolar yig‘inlari xodimlarining sa'y-harakati bilan hal etilgan muammolarga hamda fuqarolar yig‘inlarining tashabbusi bilan mutasaddi idora va tashkilotlar yordamida hal etilgan muammolarga saralanib, mazkur ko‘rsatkichlar umumlashtirilgan holda baholanadi.

Fuqarolar yig‘inlari va profilaktika (katta) inspektorlari faoliyati baholashda eng muhim ko‘rsatkichlar etib quyidagilar belgilanadi:

Tegishli hududda yashovchi fuqarolarga tadbirkorlik faoliyatini tashkil etishga ko‘maklashish;

Tadbirkorlik faoliyati uchun kredit olishga ko‘maklashish;

Aholini ish bilan ta'minlashga ko‘maklashish;

Aholining bandligini rasmiylashtirishga ko‘maklashish;

Oilaviy ajralishlar;

Ehtiyojmand va kam ta'minlangan oilalar;

Notinch oilalar;

Sodir etilgan jinoyatlar;

Sodir etilgan ma'muriy huquqbuzarliklar;

O‘z joniga qasd va suiqasd qilish holatlari;

Tomorqa yer uchastkalaridan unumli foydalanish;

Hashar yo‘li bilan o‘tqazilgan daraxtlar;

Mutasaddi idora va tashkilotlar tomonidan hal etilgan muammolar.

Fuqarolar yig‘inlari va profilaktika (katta) inspektorlari faoliyatini reyting baholash yarim yillik va yil yakuni bo‘yicha o‘tkaziladi.

Reyting baholash qonuniylik, oshkoralik, xolislik, adolatlilik, tenglik va shaffoflik prinsiplariga asoslanadi.

Reyting baholash natijasida «namunali», «yaxshi», «qoniqarli» va «qoniqarsiz» fuqarolar yig‘inlari aniqlanadi hamda «namunali» deb topilgan fuqarolar yig‘inlarining xodimlari (mahalla raisi, o‘rinbosarlari, oila va xotin-qizlar masalalari bo‘yicha mutaxassis, jamoatchilik asosida faoliyat yuritayotgan shaxslar) va faollar moddiy rag‘batlantiriladi.

Faoliyati «yaxshi» deb baholangan fuqarolar yig‘inlari namunali qilish hamda faoliyati «qoniqarli» va «qoniqarsiz» deb baholangan fuqarolar yig‘inlari faoliyatini yaxshilash chora-tadbirlari belgilanadi.

Fuqarolar yig‘inlari faoliyatini reyting baholash tuman (shahar) mahalla va oilani qo‘llab-quvvatlash bo‘limi tomonidan amalga oshiriladi.

Fuqarolar yig‘inlari faoliyatining asosiy ko‘rsatkichlari quyidagi tartibda baholanadi:

tegishli hududda yashovchi fuqarolarga tadbirkorlik faoliyatini tashkil etishga ko‘maklashish — fuqarolar yig‘ini tomonidan (tadbirkorlik sub'yektining (fuqarolar yig‘ini xodimlari yordamida tadbirkorlik faoliyatini boshlagan fuqaroning) ma'lumotlari) taqdim etilgan hisobotga tuman (shahar) mahalla va oilani qo‘llab-quvvatlash bo‘limi tomonidan tadbirkorlik sub'yektlarini davlat ro‘yxatidan o‘tkazish

va hisobga qo‘yishning avtomatlashtirilgan tizimi orqali olingan hujjatlarni solishtirish orqali aniqlik kiritiladi;

tadbirkorlik faoliyati uchun kredit olishga ko‘maklashish — fuqarolar yig‘ini tomonidan tadbirkorlik faoliyati uchun berilgan tavsiyanomalar hamda shu asosda tijorat banklari tomonidan ajratilgan kreditlar to‘g‘risidagi ma'lumot tuman (shahar) mahalla va oilani qo‘llab-quvvatlash bo‘limi tomonidan tahlil qilish orqali aniqlanadi (zarur hollarda joylarga chiqib o‘rganiladi);

aholini ish bilan ta'minlashga ko‘maklashish — fuqarolarning yangi yoki mavjud ish o‘rinlariga joylashtirilganligi bo‘yicha fuqarolar yig‘ini tomonidan berilgan hisobot tuman (shahar) mahalla va oilani qo‘llab-quvvatlash bo‘limi tomonidan ish beruvchi tomonidan berilgan yozma ma'lumot hamda ish beruvchi, ishga joylashgan shaxs va fuqarolar yig‘ini tomonidan tuzilgan uch tomonlama shartnomani o‘rganish orqali aniqlanadi;

aholining bandligini rasmiylashtirishga ko‘maklashish quyidagi tartibda aniqlanadi:

dehqon xo‘jaligi, tomorqa yerida band bo‘lgan yoki qoramol boqayotgan yoxud parranda parvarishlayotgan jismoniy shaxslarni belgilangan tartibda rasmiylashtirishga ko‘maklashilganligi fuqarolar yig‘ini tomonidan amalga oshirilgan ishlar (o‘tkazilgan suhbat va yig‘ilishlar, olib borilgan targ‘ibot-tashviqot va tushuntirish ishlari hamda ularning natijasi sifatida) tadbirkorlik bilan shug‘ullanuvchi fuqarolarning soliq to‘lovchi sifatida ro‘yxatdan o‘tganligi to‘g‘risida soliq idorasi tomonidan tuman (shahar) mahalla va oilani qo‘llab-quvvatlash bo‘limiga taqdim etgan ma'lumot bilan solishtirish orqali aniqlanadi;

yuridik shaxs tashkil etmagan holda oilaviy tadbirkorlik shaklida (yakka tartibdagi tadbirkor) faoliyatini amalga oshiruvchi fuqarolar va ularning davlat ro‘yxatiga olish to‘g‘risida guvohnomada ko‘rsatilgan oila a'zolarini belgilangan tartibda rasmiylashtirishga ko‘maklashganligi fuqarolar yig‘ini tomonidan berilgan ma'lumotlarni, tuman (shahar) aholi bandligiga ko‘maklashish markazi va davlat soliq inspeksiyasi tomonidan tuman (shahar) mahalla va oilani qo‘llab-quvvatlash bo‘limiga rasman taqdim etilgan ma'lumotlar bilan solishtirish orqali aniqlanadi;

oilaviy ajralishlar — fuqarolik holati dalolatnomalarini qayd etish organlari tomonidan rasmiylashtirilgan dalolatnomalar (sud tomonidan bedarak yo‘qolgan, muomalaga layoqatsiz deb topilgan, sodir qilgan jinoyati uchun uch yildan kam bo‘lmagan muddatga ozodlikdan mahrum qilinganligi sababli qayd etilgan ajrimlar bundan mustasno) fuqarolar yig‘inining oilaviy qadriyatlarni mustahkamlash komissiyasi tomonidan amalga oshirilgan ishlar (o‘tkazilgan suhbatlar, yig‘ilishlar va hokazo sa'y-harakatlar) yuzasidan tuman (shahar) mahalla va oilani qo‘llab-quvvatlash bo‘limiga taqdim etilgan ma'lumotlar bilan solishtirish orqali aniqlanadi;

ehtiyojmand va kam ta'minlangan oilalar — fuqarolar yig‘ini tomonidan moddiy va mulkiy holatini inobatga olgan holda belgilangan tartibda aniqlangan oilalarni, ushbu toifadan chiqarish borasida olib borilgan manzilli ishlar (ko‘rsatilgan moddiy va moliyaviy yordamlar, mahalliy hokimliklarning ijtimoiy qo‘llab-quvvatlash markazlari, davlat tashkilotlari va jamoat tuzilmalari orqali tadbirkorlikka yo‘naltirilganligi, o‘tkazilgan suhbat, uchrashuv, yig‘ilish va hokazo amaliy tadbirlar) natijasida ehtiyojmand va kam ta'minlanganlar toifasidan chiqarilgan oilalar to‘g‘risida taqdim etilgan hisobot hamkor yoki homiy tashkilotlar tomonidan tuman (shahar) mahalla va oilani qo‘llab-quvvatlash bo‘limiga taqdim etilgan ma'lumotlar bilan solishtirish orqali aniqlanadi;

notinch oilalar — tuman (shahar) mahalla va oilani qo‘llab-quvvatlash bo‘limi, tibbiyot birlashmasi va ichki ishlar bo‘limlaridan fuqarolar yig‘inlaridagi oila a'zolari, qarindoshlar yoki qo‘ni-qo‘shnilar o‘rtasida muntazam ravishda nizoli holatlar mavjud bo‘lgan oilalar, farzand tarbiyasiga salbiy ta'sir ko‘rsatayotgan ota-onalar, ichki ishlar organlari, sog‘liqni saqlash muassasalari va fuqarolar yig‘inlari hisobida turuvchi shaxslar to‘g‘risidagi ma'lumotlar olinadi. Ushbu ma'lumotlar fuqarolar yig‘ini tomonidan «notinch oilalar» va ulardagi salbiy muhitni sog‘lomlashtirish borasida olib borgan ishlari (o‘tkazilgan suhbatlar, uchrashuvlar, ko‘rsatilgan amaliy yordamlar) yuzasidan hisobotlari bilan taqqoslash orqali aniqlanadi;

sodir etilgan jinoyatlar — mahalla hududida sodir etilgan jinoyatlar bo‘yicha (alohida ma'muriy bino, hududda joylashgan korxona, tashkilot, muassasalar, umumiy ovqatlanish obektlari va savdo majmualarida ushbu mahallada istiqomat qilmaydigan fuqarolar tomonidan sodir etilgan jinoyatlar (ularni sodir etgan fuqarolarning yashash manzilidagi fuqarolar yig‘ini hisobiga qayd etiladi) bundan mustasno) fuqarolar yig‘ini tomonidan berilgan ma'lumot tuman (shahar) ichki ishlar bo‘limi tomonidan tuman (shahar) mahalla va oilani qo‘llab-quvvatlash bo‘limiga taqdim etilgan rasmiy hisobot bilan solishtirish orqali aniqlanadi;

sodir etilgan ma'muriy huquqbuzarliklar — mahalla hududida voyaga yetmaganlar, yoshlar tomonidan va oila turmushi doirasida sodir etilgan ma'muriy huquqbuzarliklar nazarda tutiladi, bunga oid ma'lumotlar fuqarolar yig‘ini tomonidan amalga oshirilgan ishlar yuzasidan taqdim etilgan ma'lumotlar tuman (shahar) ichki ishlar bo‘limi tomonidan tuman (shahar) mahalla va oilani qo‘llab-quvvatlash bo‘limiga taqdim etilgan hisobotlar bilan taqqoslanadi va asoslantirilgan ko‘rsatkichlar orqali aniqlanadi;

o‘z joniga qasd va suiqasd qilish holatlari — mahalla hududida sodir etilgan o‘z joniga qasd va suiqasd qilish holatlari bo‘yicha fuqarolar yig‘ini tomonidan berilgan ma'lumot tuman (shahar) mahalla va oilani qo‘llab-quvvatlash bo‘limi orqali aniqlanadi;

tomorqa yer uchastkalaridan unumli foydalanish — aholi xonadonlarining tomorqa yer uchastkalaridan unumli foydalanish va ko‘p qavatli uylarning atrofidagi yer maydonlarini obodonlashtirish borasida fuqarolar yig‘ini tomonidan amalga oshirilgan ishlar (o‘tkazilgan suhbatlar va yig‘ilishlar, olib borilgan targ‘ibot-tashviqot va tushuntirish ishlari, tayyorlangan foto-albomlar va hokazo tasdiqlovchi hujjatlar) bo‘yicha ma'lumotlar tuman fermer, dehqon xo‘jaliklari va tomorqa yer egalari kengashi tomonidan tuman (shahar) mahalla va oilani qo‘llab-quvvatlash bo‘limiga taqdim etilgan hisobotlar bilan solishtirma-tahlil qilish (zarur hollarda joylarga chiqib o‘rganiladi) orqali aniqlanadi;

hashar yo‘li bilan o‘tqazilgan daraxtlar — mahalla faollari va aholi tomonidan hashar yo‘li bilan ekilgan daraxt ko‘chatlari (tuman (shahar) obodonlashtirish boshqarmasi tomonidan olib borilgan obodonlashtirish ishlari, o‘tqazilgan daraxt ko‘chatlari bundan mustasno) bo‘yicha fuqarolar yig‘ini tomonidan taqdim etilgan ma'lumotlar (mahalla hududida hashar, obodonlashtirish va ko‘kalamzorlashtirish ishlarini o‘tkazish yuzasidan fuqarolar yig‘inining obodonlashtirish va ko‘kalamzorlashtirish bo‘yicha komissiyasining qarori va uning ijrosi bo‘yicha foto-albom, ekilgan daraxt ko‘chatlari bo‘yicha tuzilgan dalolatnomalar va boshqa tasdiqlovchi hujjatlar) tuman fermer, dehqon xo‘jaliklari va tomorqa yer egalari kengashi tomonidan tuman (shahar) mahalla va oilani qo‘llab-quvvatlash bo‘limiga taqdim etilgan hisobotlar bilan solishtirma-tahlil qilish (zarur hollarda joylarga chiqib o‘rganiladi) orqali aniqlanadi;

fuqarolar yig‘inlarining tashabbusi bilan mutasaddi idora va tashkilotlar yordamida hal etilgan muammolarni baholashda fuqarolar yig‘inlarining vakolati doirasidan tashqari masalalar bo‘yicha mutasaddi tashkilotlarga qilgan murojaatlari va kiritgan taqdimnomalaridan ijobiy hal etilgan muammolar bo‘yicha baholanadi.

Tuman (shahar) mahalla va oilani qo‘llab-quvvatlash bo‘limi fuqarolar yig‘inlari faoliyatini reyting baholash davrida (yarim yillik va yil yakuni bo‘yicha) mazkur nizomda qayd etilgan tashkilot va idoralar, shuningdek, jamoat tuzilmalariga tegishli ma'lumotlarni olish va foydalanish yuzasidan murojaat qilib, tegishli ma'lumot va hisobotlarni yig‘ish, tahlil qilish, shuningdek, har bir ko‘rsatkichning asoslantirilishini nazorat qiladi.

Reyting baholash fuqarolar yig‘inlarining quyidagi geografik joylashuvini inobatga olgan holda amalga oshiriladi:

shaharda;

tuman markazida;

tuman markazigacha 30 km bo‘lgan masofada;

tuman markazidan 30 km va undan olis masofada, tog‘li va cho‘l hududida;

chegara (yoki anklav) hududda joylashganligi.