Irlandiya JSST budjetiga to‘laydigan badali miqdorini to‘rt baravarga ko‘paytiradi

Irlandiya koronavirus pandemiyasi sababli Jahon sog‘liqni saqlash tashkilotini (JSST) moliyalashtirishni to‘rt baravarga ko‘paytiradi. Bu haqda mamlakat tashqi ishlar vaziri Saymon Koveni ma'lum qildi.

"Irlandiya JSSTning COVID-19 ga qarshi global kurashdagi sa'y-harakatlarini qo‘llab-quvvatlaydi. Irlandiya JSST budjetiga 2020 yil uchun to‘lanadigan badal miqdorini to‘rt baravarga - 9,5 million yevrogacha oshiradi", - deb yozdi u Twitter sahifasida.

Avvalroq AQSh prezidenti Donald Tramp Vashington JSST budjetiga badallar to‘lashni to‘xtatayotganini ma'lum qilgandi.

Trampning qarori dunyoning qator siyosiy arboblari hamda ommaviy axborot vositalari tomonidan tanqid ostiga olindi.