Mamlakatda asosiy qomusga o‘zgartirishlar kiritiladi. Rossiyaliklarning ko‘pchiligi Konstitutsiyaga o‘zgartirishlar kiritish bo‘yicha takliflarni qo‘llab-quvvatladi.
Rossiya konstitutsiyaga kiritilishi rejalashtirilayotgan o‘zgarishlar qatorida ko‘plab bo‘limlar mavjud. Masalan, mehnat muhofazasi, ish beruvchi va ishchi o‘rtasidagi munosabatlar, Rossiya suvereniteti kabi boblardagi o‘zgarishlar. Ammo yangi o‘zgarishlarning juda shov-shuvli bo‘lishiga olib kelgan taklif bu – prezidentlik muddatlarini nollashtirish. Ya'ni, shu vaqtgacha bo‘lgan muddatlarning barchasini bekor qilish. Endi Putin 2024 yildan keyin ham yana ikki muddat prezidentlikka o‘z nomzodini qo‘yishi va 2036 yilga qadar hokimiyatda qolishi mumkin bo‘ladi.
Natijalar
Markaziy saylov komissiyasi Rossiya Federatsiyasi Konstitutsiyasiga tuzatishlar kiritish bo‘yicha umummilliy ovoz berish natijalarini e'lon qildi. Protokollar 100 foiz hisob-kitob qilib chiqilganidan keyin, referendumda qatnashganlarning 77,92 foizi o‘zgartirishlarni yoqlagani, 21,27 foizi esa qarshi bo‘lganini bildirdi.
MSK raisi Ella Pamfilovaning ma'lum qilishicha, saylovda davomat 65 foizni tashkil etgan. Bu 1993 yildagi Konstitutsiya bo‘yicha referendumdagidan yaxshiroq, o‘shanda davomat 54,8 foizni tashkil etgan va saylovchilarning 58,4 foizi Konstitutsiyani ma'qullagandi.
Tuzatishlar prezident farmoni bilan kuchga kiradi. Konstitutsion qonunchilik bo‘yicha Federatsiya kengashi qo‘mitasi rahbari Andrey Klishasning ma'lum qilishicha, MSK natijalarni e'lon qilgach, prezident Konstitutsiyaga tuzatishlar kiritish to‘g‘risidagi farmonini imzolashi mumkin bo‘ladi.
Deyarli barcha regionlar «ha» dedi
Asosiy qomusga o‘zgartirishlar deyarli barcha hududlar tomonidan qo‘llab-quvvatlandi. Nenets avtonom okrugi ovoz beruvchilarning ko‘pchiligi tuzatishlarga qarshi ovoz bergan yagona region bo‘lgan.
MSK sayti ma'lumotiga ko‘ra, bu hududdagi saylovchilarning 55,25 foizi konstitutsiyaga o‘zgartirishlar kiritilishiga qarshi chiqqan, 43,78 foizi qo‘shilgan. Bu hududda davomat 58,28 foizga teng bo‘lgan.
Shuningdek, London, Nyu-York, Berlin, Vena va Parijdagi konsulxonalarda tashkil etilgan saylov uchastkalarida ham ko‘pchilik tuzatishlarga «yo‘q» degan.
Ijtimoiy tarmoqda Yakutsk meri Sardana Avksenteva bilan bog‘liq voqea muhokama qilindi. Mer tuzatishlarga qarshi bo‘lib ovoz bergan. Ammo internetda u «ha» degani ko‘rsatilgan fotoshop tarqaldi. Keyinroq uning matbuot xizmati original suratni namoyish etdi va unda mer «yo‘q»ni belgilaganini ko‘rish mumkin.
«Saylangan mer qanday qilib tuzatishlar uchun ovoz berishi mumkin, bu tuzatishlar merlar saylanishini bekor qiladiku? Bu kamida o‘z oyog‘iga o‘q otish bilan barobar», deya qayd etgan u.
Hisob-kitoblar davomida Komi Respublikasida ham «yo‘q» deganlar ko‘pchilikni tashkil etayotgani ma'lum bo‘lgandi, ammo keyinroq natijalar o‘zgardi. Protokollarning 6 foizi hisoblab chiqilgan vaqtda tuzatishlar tarafdorlari 31,01 foizni, qarshilar esa — 68,02 foizni tashkil etayotgandi, ammo protokollarning 20 foizidan ortig‘i hisoblab chiqilganidan keyin natijalar «ha» deganlar foydasiga 67,42 foizga 31,59 foiz ko‘rinishida edi. Yakunda komilik saylovchilarning 65,08 foizi tuzatishlarni yoqlab ovoz bergani, 33,94 foiz kishi qarshi bo‘lgani oydinlashdi.
Shuningdek, Omsk, Murmansk va Arxangelskda o‘zgartirishga qarshilar nisbatan ko‘pchilikni tashkil etgani kuzatilgan: bu hududlarda 40 foizga yaqin kishi qarshi ovoz bergan.
O‘z navbatida, Checheniston, Dog‘iston, Tiva va Mordoviyada faollik kuzatilgan. Chechenistonda davomat 95 foizdan ortiq bo‘lgan, saylovchilarning 97,92 foizi (712 mingdan ortiq saylovchi) tuzatishlarga «ha» degan. Tiva Respublikasida davomat 92,8 foiz, tuzatishlarni yoqlovchilar 96,79 foizni tashkil etgan. Qrimda 90,07, Dog‘istonda 89,19 va Yamalo-Nenetskiy avtonom okrugida 89,19 foiz saylovchi tuzatishlarni ma'qullagan.
Ikki hududda ovoz berish onlayn o‘tkazildi. Moskva va Nijyegorodskaya oblastida 25-30 iyun kunlari elektron ovoz berishdan foydalanildi. Uning natijalariga ko‘ra, poytaxtdagilarning 62,33 foizi, Nijyegorodskayadagilarning 59,69 foizi tuzatishlarga rozilik bergan, mos ravishda 37,67 va 40,31 foizdan kishi tuzatishlarga qarshiligini bildirgan.
