13:14 / 12.07.2020
58065
Жарқўрғонда судьялар омма олдида обрўсизлантирилди. Бош прокуратура вазиятни назоратига олди

Сурхондарё вилоятининг Жарқўрғон туманида ЖИБ туман суди раиси ҳамда туман маъмурий судининг раисига Жарқўрғон шаҳрига кираверишдаги блокпостда шахсан туман ҳокими ва туман ИИБ бошлиғи ҳаракатланишга монелик қилган.

Фото: ЎзА

Республика махсус комиссиясининг 2020 йил 9 июлдаги қарорида ҳаракатланиш учун махсус рухсатномалар талаб этилмайдиган хизмат автотранспорт воситалари рўйхати маълум қилинганди. Бу рўйхатга суд тизими ҳам киритилган.

Бироқ, айрим раҳбарлар ва ваколатли шахслар қарор моҳиятини тушунмай, суд тизими ходимлари хизмат машиналари ҳаракатига тўсқинлик қилиш ҳолатлари учраб турибди.

Судьялар олий кенгаши судьялар дахлсизлигини таъминлаш бўйича суд инспекциясидан ЎзАга маълум қилишларича, 2020 йил 10 июль куни соат 08:30 ларда Жиноят ишлари бўйича Жарқўрғон тумани судининг раиси Я.Беккамов ҳамда ҳайдовчи Р.Раҳимназаров шу судга бириктирилган «Нексия-3» русумли давлат рақами 530 YAA хизмат автотранспорт воситасида, Жарқўрғон тумани маъмурий судининг раиси Х.Раҳимова ҳамда ҳайдовчиси шу судга бириктирилган «Нексия-3» русумли давлат рақами 307 VAA хизмат автотранспорт воситасида туман суди биноси томон ҳаракатланиб келаётганида туман марказига кираверишда блокпостда улар тўхтатилган ва постдан ўтказилмаган.

Шу вақтда постда бўлган туман ҳокими Зиёдулла Давлатов бошчилигидаги ишчи гуруҳ Вазирлар Маҳкамасининг махсус комиссияси қарорига зид равишда, туман суди хизмат автомашиналарини постдан ўтказмай, хизмат автомашинаси дахлсизлигини бузиб, ишга боришга имконият бермай, йўлдан ўтишга тўсқинлик қилиб, ишчи гуруҳ аъзоларидан биттаси хизмат автомашинасининг орқа ўнг эшигини очиб қўлидаги уяли алоқа телефони билан тасвирга тушириб, постдан ўтиш учун навбат кутиб турган тирбанд фуқаролар олдида судья ва суд ходимларини обрўсизлантиришга уринган.

Уларга қўполлик қилиб, туман судининг ҳайдовчиси Р.Раҳимназаровни (ўзининг билдиргисидан) йўл патруль хизмати ходими Р.Раимов билагидан тортиб, ИИБ бошлиғи Б.Хидиров ва ўринбосари Ш.Азизбердиев автомашина калитини олиб қўйиб, уни автомашинада ўтирган жойидан куч ишлатиб тортиб, эгнидаги кўйлагини олд кўкрак қисмини йиртиб, суд ходимини туман ИИБ биносига олиб келиб, ИИБ бошлиғи ўринбосари Ш.Азизбердиев суд ходимини ҳақоратлаб, бўйнидан бўғиб, шахсий телефон аппаратини тортиб олиб, сўнгра вақтинча ушлаб туриш ҳибсхонасига қамаб қўйган.

2020 йил 10 июлдаги 442-сонли суд-тиббий текшируви далолатномасига кўра, Р.Раҳимназаровнинг баданида қонталаш ва шилинма аниқланган. Р.Раҳимназаровнинг баданида кўкрак қафаси ўнг томони, бўйин орқа ўнг томони, ўнг кўкрак соҳасида қонталашлар ва ўнг қўл тирсак ташқи юзасида шилинмалар мавжудлиги, унинг кўкрак қафаси ўнг томони, бўйин орқа ўнг томони, ўнг кўкрак соҳасидаги қонталашлари ва ўнг қўл тирсак ташқи юзасидаги шилинмалари ўтмас қаттиқ жисмларнинг бир неча марталик зарб ва ишқаланиш таъсирида етказилгани, оғирлик даражасига кўра енгил тан жароҳатлари, деб баҳоланган.

Юқоридагиларни инобатга олиб, воқеа жойида бевосита ишчи гуруҳига раҳбарлик қилган Жарқўрғон тумани ҳокими З.Давлатов, туман ИИБ бошлиғи Б.Хидиров, ўринбосари Ш.Азизбердиев ва бошқа алоқадор ходимларга нисбатан суд ходимига қасддан енгил тан жароҳати етказиш, судья ва суд ходимларини обрўсизлантириш, судьянинг хизмат автомашинаси дахлсизлигини бузиш ва бошқа ҳолатларга қонуний баҳо бериш учун тўпланган ҳужжатлар Сурхондарё вилояти прокуратурасига юборилган. 

Бош прокуратура матбуот хизмати мазкур ҳолат юзасидан Сурхондарё вилояти прокуратураси томонидан текшириш ишлари олиб борилаётгани, текшириш жараёни Бош прокуратура томонидан назоратга олингани ҳақида маълум қилди.

Top