Toshkent viloyatida daraxtlar noqonuniy kesildi, tabiatga 1,1 milliard so‘m zarar yetkazildi

Toshkent viloyatining ma'muriy markazi Nurafshon shahrida har xil turdagi manzarali daraxtlar kesilganligi aniqlandi, deb xabar berdi Davlat ekologiya qo‘mitasi.

O‘zbekiston Respublikasi Prezidentining «2030 yilgacha bo‘lgan davrda O‘zbekiston Respublikasining atrof-muhitni muhofaza qilish konsepsiyasini tasdiqlash to‘g‘risida»gi farmoniga binoan davlat o‘rmon fondiga kirmaydigan daraxtlar va butalar qimmatbaho navlarining kesilishiga 2019 yil 1 noyabrdan 2020 yil 31 dekabrgacha moratoriy joriy etilgan edi. Shunga qaramay, joylarda daraxtlarning noqonuniy kesilish holatlari sodir bo‘lmoqda.

Shu yilning 6 iyul kuni Toshkent viloyati ekologiya va atrof-muhitni muhofaza qilish boshqarmasi davlat inspektorlari tomonidan olib borilgan tezkor reyd davomida Toshkent viloyati Nurafshon shahri «Qorasuv» mahallasi, Toshkent yo‘li ko‘chasi, 4R-2 avtomobil yo‘lining To‘ytepa tekstil fabrikasigacha bo‘lgan qismida jami 37 tup har xil turdagi manzarali daraxtlar kesib tashlangani aniqlangan.

Natijada, «O‘simlik dunyosini muhofaza qilish va undan foydalanish to‘g‘risida»gi qonunning 37 va 45-moddalari talablari buzilgan, o‘simlik dunyosiga 1,1 milliard so‘m zarar yetkazilgan.

Holat yuzasidan qonunbuzarlarga nisbatan qonuniy chora ko‘rish hamda yetkazilgan zararni undirish maqsadida to‘plangan hujjatlar prokuratura organlariga yuborildi, deyiladi Davlat ekologiya qo‘mitasi xabarida.