Dam olish kunlari elektr ta'minotiga cheklov kiritilmadi, Turkmanistondan import hajmi oshirildi - «O‘zbekiston MET»

O‘zbekistonda elektr ta'minoti tizimiga 0,8-1,0 foiz miqdorida cheklovlar kiritilayotgani, bu jarayon issiqlik elektr stansiyalari ish hajmining oshirilishi evaziga bartaraf etilayotgani haqida rasmiy bayonot berilgandi.

Masalani ijobiy hal etish maqsadida Turkmanistondan elektr energiyasi importi hajmini birmuncha oshirish yuzasidan muzokaralar olib borilayotgani, bu jarayon 28 iyul sanasidan boshlanishi rejalashtirilgani haqida ma'lum qilingan edi.  

Bugun, 27 iyul kuni soat 01:35 vaqti bilan Turkmanistondan elektr energiyasi import hajmi oshirildi, deb xabar qilmoqda «O‘zbekiston MET» AJ axborot xizmati.

Hozircha 500 kV.li Qorako‘l–Serdar havo tarmoqlari orqali O‘zbekistonga 80 MVt quvvat yetkazib berilmoqda. Kun davomida yetkazib beriladigan quvvat hajmi 200 MVt.gacha yetkazilishi rejalashtirilgan. 

O‘tgan haftaning shanba va yakshanba kunlari energetika tizimida iste'molni cheklash holatlari kuzatilmadi. Turkmanistondan elektr energiyasi importining boshlanishi mamlakatimizda ishlab chiqarilayotgan asosiy elektr energiyasiga qo‘shimcha ravishda yangi haftaning ish kunlarida ham (odatda dam olish kunlariga nisbatan iste'mol darajasi keskin oshishi kuzatiladi) iste'molchilarni elektr energiyasi bilan uzluksiz ta'minlash imkonini beradi, deyiladi ma'lumotda.