Vazirlar Mahkamasi 14.08.2020 yildagi «Fuqarolar yig‘inlari faoliyati samaradorligini baholashning reyting tizimini takomillashtirish to‘g‘risida»gi 485-son qarorni qabul qildi.

Norma’ning yozishicha, prezidentning 18.02.2020 yildagi «Jamiyatda ijtimoiy-ma'naviy muhitni sog‘lomlashtirish, mahalla institutini yanada qo‘llab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari to‘g‘risida»gi PF-5938-son farmoniga muvofiq, fuqarolarning o‘zini o‘zi boshqarish organlari tuzilmasida:

  • fuqarolar yig‘ini raisining 4 ta o‘rinbosari lavozimlari tugatilgan, ularning o‘rniga yangilari – fuqarolar yig‘ini raisining uchta o‘rinbosari, ikkita maslahatchisi va bitta mutaxassis lavozimlari kiritilgan;
  • tugatilgan 6 ta komissiya (yarashtirish, ma'rifat va ma'naviyat masalalari bo‘yicha, ijtimoiy qo‘llab-quvvatlash bo‘yicha, voyaga yetmaganlar, yoshlar va sport masalalari bo‘yicha, tadbirkorlik faoliyati va oilaviy biznesni rivojlantirish masalalari bo‘yicha, jamoatchilik nazorati va iste'molchilarning huquqlarini himoya qilish bo‘yicha) o‘rniga ikkita: oilaviy qadriyatlarni mustahkamlash, ijtimoiy qo‘llab-quvvatlash va jamoatchilik nazorati bo‘yicha komissiya tashkil qilingan;
  • «Mahalla posboni» jamoatchilik tuzilmasi tugatilgan.

Qaror bilan quyidagilarni nazarda tutuvchi Fuqarolar yig‘inlari faoliyati samaradorligini baholashning reyting tizimi to‘g‘risidagi nizom tasdiqlandi:

  • fuqarolar yig‘inlari faoliyatini reyting baholashning umumiy asoslari;
  • fuqarolar yig‘inlari faoliyati samaradorligini reyting baholashning asosiy ko‘rsatkichlari va metodikasi;
  • reyting baholashning shaffof tartibi;
  • reyting baholash natijalari bo‘yicha fuqarolar yig‘inlari xodimlari va jamoatchilik asosida faoliyat yuritayotgan shaxslarni rag‘batlantirish tartibi.

Qaror bilan quyidagilar nazarda tutilgan:

  • vazirliklar, idoralar va boshqa tashkilotlar Mahalla va oilani qo‘llab-quvvatlash vazirligining Qoraqalpog‘iston Respublikasi, viloyatlar, Toshkent shahar va tuman (shahar) bo‘linmalarining so‘roviga muvofiq zarur ma'lumotlarni taqdim etadilar. Bunda ma'lumotlarning asoslanganligi, ishonchliligi va belgilangan muddatda taqdim etilishi uchun ma'lumotni kiritayotgan idoralarning birinchi rahbarlariga shaxsiy javobgarlik yuklatiladi;