Jizzax erkin iqtisodiyot zonasidagi ADM-Jizzakh 2020 yilning noyabr oyidan boshlab eng yangi modellardan bo‘lgan - KIA Seltos va KIA K5 avtomobillarini yig‘ishni boshlaydi. Bu haqda Roodell kompaniyasi xabar berdi.
Qayd etilishicha, zavodda kelgusida jahonga mashhur qator brendlar avtomobillarini ishlab chiqarish yo‘lga qo‘yiladi. O‘zbekistonda ishlab chiqarilgan avtomobillar hamkor dilerlik tarmoqlari orqali MDH davlatlariga eksport qilinadi.
- Mutlaqo yangi bo‘lgan xususiy avto ishlab chiqarishning yo‘lga qo‘yilishi - O‘zbekiston bozori uchun shunchaki tijorat yangiligi emas, balki olib borilayotgan yangi islohotlar, ham investorlar, ham iste'molchilar uchun yangi sharoitlarning yaratilishi natijasidir, – ta'kidladi Roodell bosh direktori Doniyor Davlatyorov. – Ishonch bilan aytishimiz mumkinki, mamlakatda haqiqatan ham avtomobil tarixining yangi davri boshlanmoqda, u birato‘lasi bir nechta global avtomobil brendlarining ishlab chiqarila boshlashi, ya'ni o‘zbek bozoriga kirib kelishi bilan bog‘liq. Biz yangi investorlar uchun makon, butlovchi qismlarni ishlab chiqarish va distributsiyalash bozorini shakllantirish, dilerlik va logistika markazlarini qurish uchun sharoit yaratmoqdamiz. Faoliyatimizning dastlabki yilida turli uchta mashhur avtobrendlarning avtomobillarini ishlab chiqarishni yo‘lga qo‘yishni rejalashtirganmiz.
Ayni paytda Jizzax EIZda zavod qurilishining yakuniy bosqichi davom etmoqda va turli konfiguratsiyaga ega bo‘lgan avtomobillarni ishlab chiqarish uchun mo‘ljallangan ikkita texnologik liniyasini o‘rnatish bo‘yicha tayyorgarlik ishlari olib borilmoqda.
Birinchi bosqichda zavodning ishlab chiqarish quvvati yiliga 25 ming donani tashkil etadi. Ikkinchisida - 2022 yil yakuniga qadar payvandlash, kuzovni bo‘yoqlash va yig‘uv sexlari ishga tushirilganidan keyin ushbu ko‘rsatkich 100 mingtaga ko‘payadi.
Avtomobil butlovchi qismlarini ishlab chiqarishni mahalliylashtirish hamda mahalliy, xorijiy korxonalar uchun yangi istiqbollarni yaratish va ishlab chiqarilgan avtomobillarni eksportini ta'minlash ham Roodell kompaniyasining asosiy vazifalaridan biri hisoblanadi.
